Postquam intravit in Mediam et iam appropinquabat ad Ecbatana, dixit Raphael puero: « Thobia frater! ». Et dixit ei: « Ecce ego ». Et dixit illi: « In eis, quæ sunt Raguel, hac nocte manere nos oportet. Et homo est propinquus tuus et habet filiam nomine Saram.

Et cum venisset in Ecbatana, dixit illi: « Azaria frater, duc me ad Raguel, fratrem nostrum, viam rectam ». Et duxit eum ad domum Raguel, et invenerunt illum sedentem circa ostium atrii sui et salutaverunt illum priores. Et ille dixit eis: « Bene valeatis, fratres, intrate salvi et sani ». Et induxit eos in domum suam. Et occidit arietem ex ovibus et suscepit illos libenter.

Et, postquam laverunt et se purificaverunt et discubuerunt ad cenandum, dixit Thobias ad Raphael: « Azaria frater, dic Raguel, ut det mihi Saram sororem meam ».

Et audivit Raguel hunc sermonem et dixit puero: « Manduca et bibe et suaviter tibi sit hac nocte. Non est enim homo, quem oporteat accipere Saram filiam meam nisi tu, frater. Similiter et mihi non licet eam dare alii viro nisi tibi, quia tu proximus mihi es. Verum autem tibi dicam, fili. Tradidi illam viris septem fratribus nostris, et omnes mortui sunt nocte, cum intrabant ad eam. Et nunc, fili, manduca et bibe, et Dominus faciet in vobis ».

Et dixit Thobias: « Hinc non edam neque bibam, donec, quæ sunt ad me, confirmes ».

Et Raguel dixit ei: « Facio; et ipsa datur tibi secundum iudicium libri Moysis, et de cælo iudicatum est tibi illam dari. Duc sororem tuam; amodo tu illius frater es, et hæc tua soror est. Datur tibi ex hodierno et in æternum. Et Dominus cæli bene disponat vobis, fili, hac nocte et faciat misericordiam et pacem ».

Et accersivit Raguel Saram filiam suam, et accessit ad illum. Et, apprehensa manu illius, tradidit eam illi et dixit: « Duc secundum legem et iudicium, quod scriptum est in libro Moysis dari tibi uxorem. Habe et duc ad patrem tuum sanus. Et Deus cæli det vobis bonum iter et pacem ». Et vocavit matrem eius et præcepit afferri chartam, ut faceret conscriptionem coniugii et quemadmodum tradidit illam uxorem ei secundum iudicium legis Moysis. Et attulit mater illius chartam, et ille scripsit et signavit. Et ex illa hora cœperunt manducare et bibere.

Et vocavit Raguel Ednam uxorem suam et dixit illi: « Soror, præpara cubiculum aliud et introduc eam illuc ». Et abiens stravit, sicut illi dixit, et introduxit eam illuc et lacrimata est causa illius et extersit lacrimas et dixit illi: « Forti animo esto, filia. Dominus cæli det tibi gaudium pro tædio tuo. Forti animo esto! ». Et exiit.

Et exierunt et clauserunt ostium cubiculi. Et exsurrexit Thobias de lecto et dixit ei: « Surge, soror! Oremus et deprecemur Dominum nostrum, ut faciat super nos misericordiam et sanitatem ».

Et surrexit, et cœperunt orare et deprecari Dominum, ut daretur illis sanitas. Et cœperunt dicere: « Benedictus es, Deus patrum nostrorum, et benedictum nomen tuum in omnia sæcula sæculorum! Benedicant tibi cæli et omnis creatura tua in omnia sæcula! Tu fecisti Adam et dedisti illi adiutorium firmum Evam, et ex ambobus factum est semen hominum. Et dixisti non esse bonum hominem solum: “Faciamus ei adiutorium simile sibi”. Et nunc non luxuriæ causa accipio hanc sororem meam sed in veritate. Præcipe, ut miserearis mei et illius, et consenescamus pariter sani ».

Et dixerunt: « Amen, amen! ». Et dormierunt per noctem.

Accessit unus de scribis ad Iesum et interrogavit eum: « Quod est primum omnium mandatum? ».

Iesus respondit: « Primum est: «Audi, Israel: Dominus Deus noster Dominus unus est, et diliges Dominum Deum tuum ex toto corde tuo et ex tota anima tua et ex tota mente tua et ex tota virtute tua». Secundum est illud: «Diliges proximum tuum tamquam teipsum». Maius horum aliud mandatum non est ».

Et ait illi scriba: « Bene, Magister, in veritate dixisti: «Unus est, et non est alius præter eum; et diligere eum ex toto corde et ex toto intellectu et ex tota fortitudine» et: «Diligere proximum tamquam seipsum» maius est omnibus holocautomatibus et sacrificiis ».

Et Iesus videns quod sapienter respondisset, dixit illi: « Non es longe a regno Dei ». Et nemo iam audebat eum interrogare.