Dominica post Pentecosten : Sanctissimæ Trinitatis
Tempus « per annum » – Anno A
Solemnitas
Léctio libri Exodi 34, 4b-6. 8-9
FRA •
L/F •
CMT
In diebus illis:
De nocte consurgens Moyses ascendit in montem Sinai, sicut præceperat ei Dominus, portans secum tabulas.
Cumque descendisset Dominus per nubem, stetit cum eo vocans in nomine Domini. Et transiens coram eo clamavit: « Dominus, Dominus Deus, misericors et clemens, patiens et multæ miserationis ac verax ».
Festinusque Moyses curvatus est pronus in terram et adorans ait: « Si inveni gratiam in conspectu tuo, Domine, obsecro, ut gradiaris nobiscum; populus quidem duræ cervicis est, sed tu auferes iniquitates nostras atque peccata nosque possidebis ».
Psalmus responsorius : Liber Daniélis prophétæ 3, 52a, 53, 54, 55, 56
FRA •
L/F •
CMTR/ Et laudábilis et superexaltátus in sæcula.
Benedictus es, Domine, Deus patrum nostrorum.
R/ Et laudábilis et superexaltátus in sæcula.
Benedictus es in templo sanctæ gloriæ tuæ.
R/ Et laudábilis et superexaltátus in sæcula.
Benedictus es in throno regni tui
R/ Et laudábilis et superexaltátus in sæcula.
Benedictus es, qui intueris abyssos sedens super cherubim.
R/ Et laudábilis et superexaltátus in sæcula.
Benedictus es in firmamento cæli.
R/ Et laudábilis et superexaltátus in sæcula.
Léctio Epístolæ secúndæ béati Pauli apóstoli ad Corínthios 13, 11-13
FRA •
L/F •
CMT
Fratres, gaudete, perfecti estote, exhortamini invicem, idem sapite, pacem habete, et Deus dilectionis et pacis erit vobiscum.
Salutate invicem in osculo sancto.
Salutant vos sancti omnes.
Gratia Domini Iesu Christi et caritas Dei et communicatio Sancti Spiritus cum omnibus vobis.
Allelúia
Glória Patri, et Fílio, et Spirítui Sancto, Deo qui est, et qui erat, et qui ventúrus est.
Léctio sancti Evangélii secúndum Ioánnem 3, 16-18
FRA •
L/F •
CMT
Sic dilexit Deus mundum, ut Filium suum unigenitum daret, ut omnis, qui credit in eum, non pereat, sed habeat vitam æternam. Non enim misit Deus Filium in mundum, ut iudicet mundum, sed ut salvetur mundus per ipsum. Qui credit in eum, non iudicatur; qui autem non credit, iam iudicatus est, quia non credidit in nomen Unigeniti Filii Dei.