Suscipere digneris, Domine Deus omnipotens, hos versiculos consecratos, quos supplex decantare ego cupio in honorem nominis tui, pro me misero, indigno peccatore, et pro omnibus facinoribus meis, sive actis, sive factis, dictis, cogitationibus iniquis, concupiscentiis, sive omnibus negligentiis meis magnis ac minimis. Ut hi versiculi proficiant mihi ad vitam aeternam, et ad remissionem omnium peccatorum, et ad spatium bene vivendi, et ad veram et condignam paenitentiam agendam. Amen.

VERBA mea auribus percipe, Domine, intellege clamorem meum. Intende voci orationis meae, Rex meus et Deus meus. [Ps 5:2-3]

Domine, ne in ira tua arguas me, neque in furore tuo corripias me. Miserere mihi, Domine, quoniam infirmus sum. Sana me, Domine, quoniam conturbata sunt omnia ossa mea et anima mea turbata est valde: et tu, Domine, usquequo? Convertere, Domine, et eripe animam meam. [Ps 6:2-5]

Salvum me fac ex omnibus persequentibus me; et libera me. [Ps 7:2] Miserere mihi, Domine. Vide humilitatem meam de inimicis meis. [Ps 9:14]

Respice, et exaudi me, Domine Deus meus. Illumina oculos meos, ne unquam obdormiam in morte. [Ps 12:4]

Perfice gressus meos in semitis tuis, ut non moveantur vestigia mea. Ego clamavi, quoniam exaudisti me, Deus. Inclina aurem tuam mihi, et exaudi verba mea. Mirifica misericordias tuas, Domine, qui salvos facis sperantes in te. Custodi me, Domine, ut pupillam oculi. Sub umbra alarum tuarum protege me a facie impiorum qui me afflixerunt. [cf Ps 16:5-9]

Ab occultis meis munda me, Domine, et ab alienis parce servo tuo. [cf Ps 18:13]

Tu autem, Domine, ne longe facias miserationes tuas a me. Ad defensionem meam aspice. Erue a framea, Deus, animam meam: et de manu canis unicam meam. Salva me ex ore leonis, et a cornibus unicornium humilitatem meam. [Ps 21:20-22]

Vias tuas, Domine, notas fac mihi, et semitas tuas edoce me: et dirige me in veritate tua. Reminiscere miserationum tuarum, Domine, et misericordiae tuae, quae a saeculo sunt. Delicta iuventutis et ignorantiae meae ne memineris: Secundum magnam misericordiam tuam, memor esto mei. Propter bonitatem tuam, Domine, propter nomen tuum, Domine, propitiaberis peccato meo. Copiosum est enim. [cf Ps 24:4-11]

Vide humilitatem meam et laborem meum, et dimitte omnia peccata mea. [Ps 24:18] Ne perdas cum impiis, Deus, animam meam, et cum viris sanguinum vitam meam. [Ps 25:9] Exaudi Domine, vocem meam, qua clamavi ad te: Miserere mei et exaudi me. Ne avertas faciem tuam a me, et ne declines in ira a servo tuo. Adiutor meus esto. Ne derelinquas me, neque despicias me, Deus salutaris meus. Legem pone mihi, Domine, in via tua; et dirige me in semitam rectam propter inimicos meos. Ne tradideris me in animas persequentium me. [cf Ps 26:7-12]

Ad te, Domine, clamabo. Deus meus, ne sileas a me, et ero similis descendentibus in lacum. Exaudi, Domine, vocem deprecationis meae, dum oro ad te, et dum extollo manus meas ad templum sanctum tuum. Ne simul tradas me cum peccatoribus et cum operantibus iniquitatem ne perdas me. [Ps 27:1-3] Salvum fac populum tuum, Domine, et benedic hereditati tuae, et rege eos, et extolle illos usque in saeculum. [Ps 27:9]

In te, Domine, speravi: non confundar in aeternum, in tua iustitia libera me. Inclina ad me aurem tuam, accelera ut eripias me. Esto mihi in Deum protectorem et in locum refugii, ut salvum me facias. In manus tuas, Domine, commendo spiritum meum. Redemisti me, Domine, Deus veritatis. [cf Ps 30:2-6]

Eripe me de manibus inimicorum meorum, et a persequentibus me. Illumina faciem tuam super servum tuum, et salvum me fac in tua misericordia. Domine, non confundar, quoniam invocavi te. [Ps 30:16-18] Fiat misericordia tua, Domine, super nos, sicut speravimus in te. [Ps 32:22]

Iudica, Domine, nocentes me: expugna impugnantes me. Apprehende arma et scutum et exsurge in adiutorium mihi. [Ps 34:1-2]

Ne sileas, Domine, ne discedas a me. Exsurge, Domine, intende iudicium meum. Deus meus et Dominus meus, in causam meam. Iudica me secundum misericordiam tuam, Domine Deus meus. [Ps 34:22-24]

Praetende misericordiam tuam scientibus te, et iustitiam tuam his qui recto sunt corde. Non veniat mihi pes superbiae, et manus peccatoris non moveat me. [Ps 35:11-12]

Ne derelinquas me, Domine Deus meus, ne discesseris a me. Intende in adiutorium meum, Domine Deus salutis meae. [Ps 37:22-23]

Exaudi, Deus, orationem meam et deprecationem meam. Auribus percipe lacrimas meas: ne sileas a me, quoniam incola ego sum apud te in terra et peregrinus sicut omnes patres mei. Remitte mihi ut refrigerer priusquam abeam et amplius non ero. [Ps 38:13-14]

Tu autem, Domine, ne longe facias misericordias tuas a me: misericordia tua et veritas tua semper susceperunt me, quoniam circumdederunt me mala, quorum non est numerus. Comprehenderunt me iniquitates meae, et non potui ut viderem. Multiplicatae sunt super capillos capitis mei et cor meum dereliquit me. Complaceat tibi, Domine, ut eripias me, Domine, in auxilium meum respice. [Ps 39:12-14]

Ego vero egenus et pauper sum. Deus, adiuva me. Adiutor meus et liberator meus esto, Domine, ne tardaveris. [Ps 69:6]

Ego dixi: Domine, miserere mei, sana animam meam, quia peccavi tibi. [Ps 40:5]

Exsurge, quare obdormis, Domine? Exsurge, et ne repellas in finem. Quare faciem tuam avertis? Oblivisceris inopiam nostram et tribulationem nostram? Exsurge, Domine, adiuva nos et libera nos propter nomen tuum. [cf Ps 43:23-26]

Miserere mei, Deus, secundum magnam misericordiam tuam: et secundum multitudinem miserationum tuarum, dele iniquitatem meam. Amplius lava me ab iniustitia mea, et a delicto meo munda me. [Ps 50:3-4] Averte faciem tuam a peccatis meis, et omnes iniquitates meas dele. Cor mundum crea in me, Deus, et spiritum rectum innova in visceribus meis. Ne proiicias me a facie tua, et Spiritum Sanctum tuum ne auferas a me. Redde mihi laetitiam salutaris tui et Spiritu principali confirma me. Domine, labia mea aperies, et os meum annuntiabit laudem tuam. [Ps 50:11-17]

Deus, in nomine tuo salvum me fac, et in virtute tua libera me. Deus, exaudi orationem. Auribus percipe verba oris mei. [Ps 53:3-4]

Exaudi, Deus, orationem meam, et ne despexeris deprecationem meam. Intende in me, et exaudi me. [Ps 54:2-3]

In Deo laudabo verbum, et in Domino laudabo sermonem: in Deo sperabo, non timebo quid faciat mihi homo. In me sunt, Deus, vota quae reddam, laudationes tibi, quoniam eripuisti animam meam de morte, oculos meos a lacrimis, pedes meos a lapsu, ut placeam coram Domino in lumine viventium. [Ps 55:11-13]

Miserere mei, Deus, miserere mei, quoniam in te confidit anima mea: et in umbra alarum tuarum sperabo, donec transeat iniquitas. [Ps 56:2]

Eripe me de inimicis meis, Deus meus, et ab insurgentibus in me libera me. Eripe me de operantibus iniquitatem, et de viris sanguinum salva me: quia ecce occupaverunt animam meam, irruerunt in me fortes. [Ps 58:2-4]

Ego vero orationem meam ad te, Domine, tempus beneplaciti, Deus. In multitudine misericordiae tuae exaudi me, in veritate salutis tuae. Eripe me de luto, ut non inhaeream. Libera me ex odientibus me, et de profundo aquarum, non me demergat tempestas aquae, neque absorbeat me profundum, neque urgeat super me puteus os suum. Exaudi me, Domine, quoniam benigna est misericordia tua; secundum multitudinem miserationum tuarum respice in me. Ne avertas faciem tuam a puero tuo, quoniam tribulor. Velociter exaudi me. Intende animae meae et libera eam; propter inimicos meos eripe me. [Ps 68:14-19]

Deus, in adiutorium meum intende; Domine, ad adiuvandum me festina. Ego vero egenus et pauper sum. Deus, adiuva me. Adiutor meus et liberator meus es tu, Domine: ne tardaveris. [cf Ps 69]

In te, Domine, speravi: non confundar in aeternum. In tua iustitia libera me et eripe me. Inclina ad me aurem tuam: accelera ut eripias me. Esto mihi in Deum protectorem et in locum refugii, ut salvum me facias. Et tu, Domine, adiutor fortis. Repleatur os meum laude tua, ut possim cantare gloriam tuam tota die magnificentiam tuam. Ne proiicias me in tempore senectutis, dum defecerit virtus mea. Deus, ne derelinquas me; Deus, ne elonges a me. Deus meus, in auxilium meum respice: ego autem semper in te sperabo, Domine, et adiiciam super omnem laudem tuam: os meum pronuntiabit iustitiam tuam, tota die salutare tuum. [cf Ps 70:1-15]

Ne tradas bestiis animas confitentes tibi, et animas pauperum tuorum ne obliviscaris in finem. Respice in testamentum tuum, quia repleti sunt terrae domorum iniquitatum. [Ps 73:19-20]

Adiuva nos, Deus salutaris noster, et propter honorem nominis tui, Domine, libera nos, et propitius esto peccatis nostris propter nomen tuum. [Ps 78:9]

Excita, Domine, potentiam tuam, et veni ut salvos facias nos. Domine Deus virtutum, converte nos, et ostende faciem tuam, et salvi erimus. [Ps 79:3-4]

Converte nos, Deus salutaris noster, et averte iram tuam a nobis: ut non in aeternum irascaris nobis, neque extendas iram tuam a progenie in progenies. Deus, tu convertens vivificabis nos, et plebs tua laetabitur in te. Ostende nobis, Domine, misericordiam tuam, et salutare tuum da nobis. [Ps 84:5-8]

Inclina, Domine, aurem tuam ad me et exaudi me, quoniam egenus et pauper sum ego. Custodi animam meam quoniam sanctus sum. Salvum fac servum tuum, Deus meus, sperantem in te. Miserere mihi, Domine, quoniam ad te clamavi tota die: laetifica animam servi tui, quia ad te, Domine, levavi animam meam. Et tu, Domine Deus meus, miserator et misericors, patiens et multum misericors, et verax, respice in me, et miserere mei: da potestatem puero tuo, et salvum fac filium ancillae tuae. Fac mecum, Domine, signum in bonum, ut videant qui me oderunt et confundantur, quoniam tu, Domine, adiuvasti me. [cf Ps 85]

Domine Deus salutis meae, in die clamavi et nocte coram te. Intret oratio mea in conspectu tuo: inclina aurem tuam ad precem meam, Domine. [Ps 87:2-3]

Ubi sunt misericordiae tuae antiquae, Domine, sicut iurasti David in veritate tua? Memor esto opprobrii servorum tuorum quod continui in sinu meo multarum gentium. [Ps 88:50-51]

Converte, Domine, aliquantulum, et deprecare super servos tuos. [Ps 89:13] Et sit splendor Domini Dei nostri super nos, et opera manuum nostrarum dirige super nos. [Ps 89:17] Domine, exaudi orationem meam, et clamor meus ad te perveniat. Ne avertas faciem tuam a me: in quacumque die tribulor, inclina ad me aurem tuam in quacumque die invocavero te, velociter exaudi me. [Ps 101:2-3]

Ne educas me in dimidio dierum meorum in generationem et generationem anni tui. [Ps 101:25] Et tu, Domine, fac mecum misericordiam propter nomen tuum, quoniam suavis est misericordia tua. Libera me, quoniam egenus et pauper sum ego, et cor meum conturbatum est in me. Sicut umbra cum declinat ablatus sum, et excussus sum sicut locusta. [Ps 108:21-23] Adiuva me, Domine Deus meus, et salvum me fac propter misericordiam tuam. [Ps 108:26]

Retribue servo tuo ut vivam et custodiam sermones tuos. Revela oculos meos, et considerabo mirabilia de lege tua. Incola ego sum in terra: non abscondas a me mandata tua. [Ps 118:17-19]

Confirma me, Domine, in sermonibus tuis. Viam iniquitatis amove a me, et de lege tua miserere mei. [Ps 118:28] Deduc me in semitam mandatorum tuorum, quia ipsam volui. Inclina cor meum in testimonia tua, et non in avaritiam. Averte oculos meos, ne videant vanitatem. In via tua vivifica me. Statue servo tuo eloquium tuum in timore tuo. [Ps 118:35-38]

Bonitatem, et disciplinam, et scientiam doce me, quia in mandatis tuis credidi. [Ps 118:66] Bonus es tu, Domine, et in bonitate tua doce me iustificationes tuas. [Ps 118:68] Fiat nunc, Domine, misericordia tua, ut consoletur me secundum eloquium tuum servo tuo. Veniant mihi miserationes tuae, et vivam, quia lex tua meditatio mea est. [Ps 118:76-77] Fiat cor meum immaculatum in tuis iustificationibus, ut non confundar. [Ps 118:80] Humiliatus sum usquequaque, Domine. Vivifica me secundum verbum tuum. Voluntaria oris mei beneplacita fac, Domine, et iudicia tua doce me. [Ps 118:107-108] Suscipe me secundum eloquium tuum, et vivam, et ne confundas me ab expectatione mea. Adiuva me, et salvus ero, et meditabor in tuis iustificationibus. [Ps 118:116-117] Fac cum servo tuo secundum misericordiam tuam et iustificationes tuas doce me. Servus tuus sum ego: da mihi intellectum, ut sciam testimonia tua. [Ps 118:124-125] Respice in me, et miserere mei secundum iudicium diligentium nomen tuum. Gressus meos dirige secundum eloquium tuum, ut non dominetur mei omnis iniustitia. Redime me a calumniis hominum, ut custodiam mandata tua. Faciem tuam illumina super servum tuum et doce me iustificationes tuas. [Ps 118:132-135] Vocem meam audi secundum misericordiam tuam, Domine, et secundum iudicium tuum vivifica me. [Ps 118:149]

Vide humilitatem meam et eripe me, quia legem tuam non sum oblitus. Iudica iudicium meum et redime me: propter eloquium tuum vivifica me. [Ps 118:153-154] Appropiet oratio mea in conspectu tuo, Domine, secundum eloquium tuum da mihi intellectum. Intret postulatio mea in conspectu tuo, Domine, secundum eloquium tuum eripe me. Eructabunt labia mea hymnum, cum docueris me iustificationes tuas. Pronuntiabit lingua mea eloquia tua, quia omnia mandata tua aequitas. Fiat manus tua, ut salvum me faciat, quia mandata tua elegi. Concupivi salutare tuum, Domine, et lex tua meditatio mea est. Vivet anima mea, et laudabit te, et iudicia tua adiuvabunt me. Erravi sicut ovis quae perierat. Require servum tuum, Domine, quia mandata tua non sum oblitus. [Ps 118:169-176]

Miserere nobis, Domine, miserere nobis, quia multum repleti sumus contemptione. [Ps 122:3] Benefac, Domine, bonis et rectis corde. [Ps 124:4] Converte, Domine, captivitatem nostram sicut torrens in austro. [Ps 125:4] De profundis clamavi ad te, Domine. Domine, exaudi vocem meam. Fiant aures tuae intendentes in orationem servi tui. [Ps 129:1-2] In quacumque die invocavero te, exaudi me: multiplicabis in anima mea virtutem tuam, [Ps 137:3] et deduc me, Domine, in via aeterna. [Ps 138:24] Pone, Domine, custodiam ori meo, et ostium circumstantiae labiis meis. Non declines cor meum in verbum malum. [Ps 140:3-4] Intende in humilitatem meam, quia humiliatus sum nimis. Libera me a persequentibus me, quoniam confortati sunt super me. Educ de carcere animam meam, ad confitendum nomini tuo, Domine. Me expectant iusti, donec retribuas mihi. [Ps 141:7-8] Domine, exaudi orationem meam: in veritate exaudi me: in tua iustitia: et ne intres in iudicium cum servo tuo, quia non iustificabitur in conspectu tuo omnis vivens. Quia persecutus est inimicus animam meam, humiliavit in terra vitam meam. [cf Ps 142:1-3] Velociter exaudi me, Domine, defecit spiritus meus. Ne avertas faciem tuam a me, et ero similis descendentibus in lacum. Auditam mihi fac mane misericordiam tuam. Notam fac mihi viam in qua ambulem, quia ad te, Domine, levavi animam meam. Eripe me de inimicis meis. Domine, ad te confugi, doce me facere voluntatem tuam, quia tu es Deus meus. Spiritus tuus bonus deducet me in viam rectam, propter nomen tuum, Domine, vivificabis me in aequitate tua. Et educes de tribulatione animam meam, et in misericordia tua disperdes inimicos meos. Et perdes omnes qui tribulant animam meam, quoniam servus tuus sum ego. [Ps 142:7-12]

Gloria Patri, et Filio, et Spiritui Sancto. Sicut erat in principio, et nunc, et semper, et in saecula saeculorum. Amen.

Benedicam Dominum in omne tempore: semper laus eius in ore meo. [Ps 33:2] Tibi soli peccavi, et malum coram te feci. [Ps 50:6] Delictum meum cognitum tibi feci, et iniustitiam meam non abscondi: Dixi: Confitebor adversum me iniustitiam meam Domino: et tu remisisti impietatem peccati mei. Pro hac orabit ad te omnis sanctus in tempore opportuno. [Ps 31:5-6] Tu autem, Domine, miserere mei; et resuscita me, et retribuam eis. In hoc cognovi quoniam voluisti me, quoniam non gaudebit inimicus meus super me. Me autem propter innocentiam suscepisti, et confirmasti me in conspectu tuo in aeternum. Benedictus Dominus Deus Israel a saeculo usque in saeculum. Fiat, Fiat. [Ps 40:11-14] In manus tuas, Domine, commendo spiritum meum. Redemisti me, Domine Deus veritatis: salus mea de manu Domini, et gloria mea in conspectu Dei [cf Ps 30:6]

Si ante oculos tuos, Domine, culpas quas fecimus, et plagas quas excipimus, conferamus, minus est quod patimur, maius est quod meremur. Peccati poenam sentimus, et peccandi pertinaciam non vitamus. In flagellis tuis fragilitas nostra frangitur, et iniquitas non mutatur. Mens aegrota torquetur, et cervix dura non flectitur. Vita in dolore suspirat, et tamen in opere non se emendat. Si expectas, non corrigimur, si vindicas, non duramus. Confitemur in correptione, quod fecimus: obliviscimur in visitatione quod flevimus. Si impresseris manum, facienda promittimus; si suspenderis gladium, promissa non facimus. Si ferias, clamamus, ut parcas; si parcas iterum te provocamus ut ferias. Si angustiae veniunt, tempus petimus paenitendi; si misericordia subveniat, abutimur patientia quae pepercit. Adhuc plaga illata vix praeterit, et iam non recolit mens ingrata quod pertulit. Si citius nos exaudias, ex misericordia insolescimus; si tardius, ex impatientia murmuramus. Te Domine, volumus servare quod feceris, non timemus negligere quod iusseris. Habes, Domine, confitentes reos: parce, quia pius es. Novimus quod, nisi dimittas, recte nos punias. Sed apud te est multa miseratio et propitiatio perabundans. Praesta sine merito quod rogamus, qui fecisti ex nihilo qui te rogarent. Clamantibus autem nobis ad te, Domine, miserere. Moveat misericordiam tuam vox fidelis et flebilis, atque illa (de qua totum speramus) pietas non reputet quod offendimus, dum respicit quod rogamus: et cum grandis sit miseria esse nos reos, maior tibi sit clementia esse nos miseros. Tuo supplices auxilio, ante te et criminis nostri mala ponimus et dolores, a te precando misericordiam (quam peccando repulimus) exspectamus. Praestetur his de indulgentia quod rogaris accipere, quos agnoscis fiduciam de sua iustitia non habere. Erige nos, Domine Deus noster, et alleva in misericordia tua, ut communione salutis et gaudio caritatis, dum ipsi salvari ex munere tuo cupimus, etiam fide et pace cunctarum gentium gaudeamus. Per ...

1. Homicidium voluntarium.
2. Peccatum Sodomitarum.
3. Clamor populi oppressi.
4. Iniustitia in mercenarium.

Prudentia
Iustitia
Fortitudo
Temperantia

QUEM terra, pontus, aethera¹
colunt, adorant, praedicant,
trinam regentem machinam
claustrum Mariae baiulat.

Cui Luna, Sol, et omnia
deserviunt per tempora,
perfusa caeli gratia,
gestant Puellae viscera.

Beata Mater, munere,
cuius supernus Artifex,
mundum pugillo continens,
ventris sub arca clausus est.

Beata caeli nuntio,
fecunda Sancto Spiritu,
desideratus Gentibus,
cuius per alvum fusus est.

Iesu, Tibi sit gloria,
qui natus es de Virgine,
cum Patre, et almo Spiritu,
in sempiterna saecula. Amen.

QUICUMQUE vult salvus esse, ante omnia opus est, ut teneat catholicam fidem:

Quam nisi quisque integram inviolatamque servaverit, absque dubio in aeternum peribit.

Fides autem catholica haec est: ut unum Deum in Trinitate, et Trinitatem in unitate veneremur.

Neque confundentes personas, neque substantiam separantes.

Alia est enim persona Patris alia Filii, alia Spiritus Sancti:

Sed Patris, et Fili, et Spiritus Sancti una est divinitas, aequalis gloria, coaeterna maiestas.

Qualis Pater, talis Filius, talis Spiritus Sanctus.

Increatus Pater, increatus Filius, increatus Spiritus Sanctus.

Immensus Pater, immensus Filius, immensus Spiritus Sanctus.

Aeternus Pater, aeternus Filius, aeternus Spiritus Sanctus.

Et tamen non tres aeterni, sed unus aeternus.

Sicut non tres increati, nec tres immensi, sed unus increatus, et unus immensus.

Similiter omnipotens Pater, omnipotens Filius, omnipotens Spiritus Sanctus.

Et tamen non tres omnipotentes, sed unus omnipotens.

Ita Deus Pater, Deus Filius, Deus Spiritus Sanctus.

Et tamen non tres dii, sed unus est Deus.

Ita Dominus Pater, Dominus Filius, Dominus Spiritus Sanctus.

Et tamen non tres Domini, sed unus est Dominus.

Quia, sicut singillatim unamquamque personam Deum ac Dominum confiteri christiana veritate compellimur: ita tres Deos aut Dominos dicere catholica religione prohibemur.

Pater a nullo est factus: nec creatus, nec genitus.

Filius a Patre solo est: non factus, nec creatus, sed genitus.

Spiritus Sanctus a Patre et Filio: non factus, nec creatus, nec genitus, sed procedens.

Unus ergo Pater, non tres Patres: unus Filius, non tres Filii: unus Spiritus Sanctus, non tres Spiritus Sancti.

Et in hac Trinitate nihil prius aut posterius, nihil maius aut minus: sed totae tres personae coaeternae sibi sunt et coaequales.

Ita ut per omnia, sicut iam supra dictum est, et unitas in Trinitate, et Trinitas in unitate veneranda sit.

Qui vult ergo salvus esse, ita de Trinitate sentiat.

Sed necessarium est ad aeternam salutem, ut incarnationem quoque Domini nostri Iesu Christi fideliter credat.

Est ergo fides recta ut credamus et confiteamur, quia Dominus noster Iesus Christus, Dei Filius, Deus et homo est.

Deus est ex substantia Patris ante saecula genitus: et homo est ex substantia matris in saeculo natus.

Perfectus Deus, perfectus homo: ex anima rationali et humana carne subsistens.

Aequalis Patri secundum divinitatem: minor Patre secundum humanitatem.

Qui licet Deus sit et homo, non duo tamen, sed unus est Christus.

Unus autem non conversione divinitatis in carnem, sed assumptione humanitatis in Deum.

Unus omnino, non confusione substantiae, sed unitate personae.

Nam sicut anima rationalis et caro unus est homo: ita Deus et homo unus est Christus.

Qui passus est pro salute nostra: descendit ad inferos: tertia die resurrexit a mortuis.

Ascendit ad caelos, sedet ad dexteram Dei Patris omnipotentis: inde venturus est iudicare vivos et mortuos.

Ad cuius adventum omnes homines resurgere habent cum corporibus suis: et reddituri sunt de factis propriis rationem.

Et qui bona egerunt, ibunt in vitam aeternam: qui vero mala, in ignem aeternum.

Haec est fides catholica, quam nisi quisque fideliter firmiterque crediderit, salvus esse non poterit. Amen.

Ante vel post Communionem utilissime recitanda.

I. Detestor et abominor omnia et singula peccata mea, et omnium aliorum commissa ab initio mundi usque in hanc horam, et deinceps usque ad finem mundi committenda: et, si possum, impedirem per gratiam Dei, quam supplex invoco.

II. Laudo et approbo omnia bona opera, facta a principio mundi usque in hanc horam, et deinceps usque in finem mundi facienda: et, si possem, ea multiplicarem per gratiam Dei, quam supplex invoco.

III. Intendo omnia facere, dicere et cogitare ad maiorem Dei gloriam, cum omnibus illis bonis intentionibus, quas Sancti unquam habuerunt, vel habebunt, vel habere possunt.

IV. Ignosco et dimitto ex toto corde meo omnibus inimicis meis, omnibus me calumniantibus, omnis mihi detrahentibus, omnibus quocumque modo mihi nocentibus, vel volentibus mala.

V. Utinam omnes homines salvare possem moriendo pro singulis! Libenter id facerem per gratiam Dei, quam propterea suppliciter imploro, et sine qua nihil possum.

RECORDARE, Virgo Mater Dei, dum steteris in conspectu Domini, ut loquaris pro nobis bona et ut avertat indignationem suam a nobis.

Sancta Mater, istud agas,
Crucifixi fige plagas
Cordi meo valide.

Fac, ut portem Christi mortem,
Passionis fac consortem,
Et plagas recolere.

Flammis ne urar succensus,
Per te, Virgo, sim defensus
In die iudicii.

Christe, cum sit hinc exire,
Da per Matrem me venire
Ad palmam victoriae.

Quando corpus morietur,
Fac, ut animae donetur
Paradisi gloria. Amen.

V. Ora pro nobis, quaesumus, Virgo dolorosissima.
R. Quae iuxta crucem Iesu constitisti.

Oremus:
Interveniat pro nobis, quaesumus, Domine Iesu Christe, nunc et in hora mortis nostrae, apud tuam clementiam beata Virgo Maria tua, cuius sacratissimam animam in hora tuae passionis doloris gladius pertransivit. Per te, Iesu Christe, Salvator mundi, qui cum Patre et Spiritu Sancto vivis et regnas in saecula saeculorum. Amen.

Ter: Ave, Maria....

V. Nostra Domina a bona morte,
R. Ora pro nobis.

V. Sancte Ioseph,
R. Ora pro nobis.