Qui docti fúerint, fulgébunt quasi splendor firmaménti,

et qui ad iustítiam erúdiunt multos,

quasi stellæ in perpétuas æternitátes (T.P. allelúia).

Sapiéntiam Sanctórum narrent pópuli,

et laudes eórum núntiet Ecclésia;

nómina autem eórum vivent in sæculum sæculi (T.P. allelúia).

Dómine Deus, qui beátum N.

cælésti doctrína imbúere dignátus es,

da nobis, ipsíus intervéntu,

eándem doctrínam fidéliter custodíre

et móribus profitéri.

Per Dóminum.

Illa nos, quæsumus, Dómine, divína tractántes,

Spíritus Sanctus fídei luce perfúndat,

qua beátum N. ad glóriæ tuæ propagatiónem

iúgiter collustrávit.

Per Christum.

Vere dignum et iustum est, æquum et salutáre,

nos tibi semper et ubíque grátias ágere:

Dómine, sancte Pater, omnípotens ætérne Deus:

per Christum Dóminum nostrum.

Quia sic tríbuis Ecclésiam tuam sancti N. festivitáte gaudére,

ut eam exémplo piæ conversatiónis corróbores,

verbo prædicatiónis erúdias,

gratáque tibi supplicatióne tueáris.

Et ídeo, cum Angelórum atque Sanctórum turba,

hymnum laudis tibi cánimus, sine fine dicéntes:

Sanctus, Sanctus, Sanctus Dóminus Deus Sábaoth.

Pleni sunt cæli et terra glória tua.

Hosánna in excélsis.

Benedíctus qui venit in nómine Dómini.

Hosánna in excélsis.

Nos prædicámus Christum crucifíxum,

Christum, Dei virtútem et Dei sapiéntiam (T.P. allelúia).

Cælésti alimónia refécti, súpplices te, Dómine,

deprecámur, ut, beáti N. mónitis obsequéntes,

de accéptis donis semper in gratiárum actióne maneámus.

Per Christum.