Visitábo oves meas, dicit Dóminus,

et suscitábo pastórem qui pascat eas:

ego autem Dóminus ero eis in Deum (T.P. allelúia).

Iste est fidélis et prudens dispensátor,

quem constítuit Dóminus super famíliam suam,

ut det illis in témpore trítici mensúram (T.P. allelúia).

Omnípotens sempitérne Deus,

qui beátum N.

epíscopum plebi tuæ sanctæ præésse voluísti,

quæsumus, ut, eius suffragántibus méritis,

pietátis tuæ grátiam largiáris.

Per Dóminum.

Omnípotens ætérne Deus,

qui beátum N. epíscopum Ecclésiæ tuæ sanctæ dedísti,

præsta, ut, quod ille divíno affátus spíritu dócuit,

nostris iúgiter stabiliátur in córdibus,

et, quem patrónum, te donánte, ampléctimur,

eum apud tuam misericórdiam defensórem habeámus.

Per Dóminum.

Hóstias, quæsumus, Dómine, quas in festivitáte beáti N.

sacris altáribus exhibémus, propítius réspice,

ut, nobis indulgéntiam largiéndo,

tuo nómini dent honórem.

Per Christum.

Vere dignum et iustum est, æquum et salutáre,

nos tibi semper et ubíque grátias ágere:

Dómine, sancte Pater, omnípotens ætérne Deus:

per Christum Dóminum nostrum.

Quia sic tríbuis Ecclésiam tuam sancti N. festivitáte gaudére,

ut eam exémplo piæ conversatiónis corróbores,

verbo prædicatiónis erúdias,

gratáque tibi supplicatióne tueáris.

Et ídeo, cum Angelórum atque Sanctórum turba,

hymnum laudis tibi cánimus, sine fine dicéntes:

Sanctus, Sanctus, Sanctus Dóminus Deus Sábaoth.

Pleni sunt cæli et terra glória tua.

Hosánna in excélsis.

Benedíctus qui venit in nómine Dómini.

Hosánna in excélsis.

Non vos me elegístis, dicit Dóminus;

sed ego elégi vos, et pósui vos ut eátis et fructum afferátis,

et fructus vester máneat (T.P. allelúia).

Beátus ille servus, quem, cum vénerit dóminus eius,

et pulsáverit iánuam, invénerit vigilántem (T.P. allelúia).

Refécti sacris mystériis, Dómine, humíliter deprecámur,

ut, beáti N. exémplo, studeámus confitéri quod crédidit,

et ópere exercére quod dócuit.

Per Christum.