Ubi fratres in unum gloríficant Deum,

ibi dabit Dóminus benedictiónem (T.P. allelúia).

Repleátur os meum laude tua, ut possim cantáre;

gaudébunt lábia mea, dum cantávero tibi (T.P. allelúia).

Deus, qui fámulum tuum beátum N.

ad Christi sequélam benígnus vocásti,

eius, quæsumus, intercessióne, concéde,

ut, nosmetípsos abnegántes,

tibi toto corde adhærére valeámus.

Per Dóminum.

Súscipe, Dómine, quæsumus,

hóstias pro salúte tuæ plebis oblátas,

quibus nos, intercedénte beáto N.,

et peccándi illécebras fúgere valeámus

et caeléstibus propinquáre consórtiis.

Per Christum.

Vere dignum et iustum est, æquum et salutáre,

nos tibi semper et ubíque grátias ágere:

Dómine, sancte Pater, omnípotens ætérne Deus:

In Sanctis enim, qui Christo se dedicavérunt

propter regnum cælórum,

tuam decet providéntiam celebráre mirábilem,

qua humánam substántiam

et ad primæ oríginis révocas sanctitátem,

et perdúcis ad experiénda dona,

quæ in novo sæculo sunt habénda.

Et ídeo, cum Sanctis et Angelis univérsis,

te collaudámus, sine fine dicéntes:

Sanctus, Sanctus, Sanctus Dóminus Deus Sábaoth.

Pleni sunt cæli et terra glória tua.

Hosánna in excélsis.

Benedíctus qui venit in nómine Dómini.

Hosánna in excélsis.

Qui verbum Dei rétinent corde perfécto et óptimo,

fructum áfferunt in patiéntia (T.P. allelúia).

Beáti qui hábitant in domo tua, Dómine,

in perpétuum laudábunt te (T.P. allelúia).

Annue, quæsumus, Dómine, Deus noster,

ut, beáti N. fulti præsídio,

per hoc tuæ sapiéntiæ sacraméntum

æqua moderatióne vivámus.

Per Christum.