Isti sunt sancti, qui accepérunt benedictiónem a Dómino

et misericórdiam a Deo salutári suo,

quia hæc est generátio quæréntium Dóminum (T.P. allelúia).

Lætétur cor quæréntium Dóminum;

quæritis Dóminum et confirmámini,

quærite fáciem eius semper (T.P. allelúia).

Deus, qui beátum N.

ad tuum regnum in hoc sæculo perquiréndum,

per caritátis perféctæ prosecutiónem vocásti,

concéde, ut, eius intercessióne roboráti,

in dilectiónis via spíritu gaudéntes progrediámur.

Per Dóminum.

Accépta tibi sint, quæsumus, Dómine,

múnera nostræ servitútis

pro beáti N. commemoratióne altári tuo propósita,

et concéde, ut, a terrénis impediméntis absolúti,

te solo dívites efficiámur.

Per Christum.

Vere dignum et iustum est, æquum et salutáre,

nos tibi semper et ubíque grátias ágere:

Dómine, sancte Pater, omnípotens ætérne Deus:

In Sanctis enim, qui Christo se dedicavérunt

propter regnum cælórum,

tuam decet providéntiam celebráre mirábilem,

qua humánam substántiam

et ad primæ oríginis révocas sanctitátem,

et perdúcis ad experiénda dona,

quæ in novo sæculo sunt habénda.

Et ídeo, cum Sanctis et Angelis univérsis,

te collaudámus, sine fine dicéntes:

Sanctus, Sanctus, Sanctus Dóminus Deus Sábaoth.

Pleni sunt cæli et terra glória tua.

Hosánna in excélsis.

Benedíctus qui venit in nómine Dómini.

Hosánna in excélsis.

Gustáte et vidéte quóniam suávis est Dóminus:

beátus vir, qui sperat in eo (T.P. allelúia).

Beáti páuperes spíritu,

quóniam ipsórum est regnum cælórum (T.P. allelúia).

Quæsumus, omnípotens Deus,

ut, qui huius sacraménti munímur virtúte,

exémplo beáti N., discámus te super ómnia semper inquírere,

et novi hóminis formam in hoc sæculo portáre.

Per Christum.