Hæc est virgo sápiens, et una de número prudéntum,

quæ óbviam Christo cum lámpade accénsa éxiit

(T.P. allelúia).

O quam pulchra es, virgo Christi,

quae corónam Dómini digna fuísti accípere,

corónam perpétuæ virginitátis (T.P. allelúia).

Exáudi nos, Deus, salutáris noster,

ut, sicut de beátæ N. vírginis commemoratióne gaudémus,

ita piæ devotiónis erudiámur afféctu.

Per Dóminum.

In beáta vírgine N. te, Dómine, mirábilem prædicántes,

maiestátem tuam supplíciter exorámus,

ut, sicut eius tibi grata sunt mérita,

sic nostræ servitútis accépta reddántur offícia.

Per Christum.

Vere dignum et iustum est, æquum et salutáre,

nos tibi semper et ubíque grátias ágere:

Dómine, sancte Pater, omnípotens ætérne Deus:

In Sanctis enim, qui Christo se dedicavérunt

propter regnum cælórum,

tuam decet providéntiam celebráre mirábilem,

qua humánam substántiam

et ad primæ oríginis révocas sanctitátem,

et perdúcis ad experiénda dona,

quæ in novo sæculo sunt habénda.

Et ídeo, cum Sanctis et Angelis univérsis,

te collaudámus, sine fine dicéntes:

Sanctus, Sanctus, Sanctus Dóminus Deus Sábaoth.

Pleni sunt cæli et terra glória tua.

Hosánna in excélsis.

Benedíctus qui venit in nómine Dómini.

Hosánna in excélsis.

Ecce Sponsus venit:

exíte óbviam Christo Dómino (T.P. allelúia).

Unam pétii a Dómino, hanc requíram:

ut inhábitem in domo Dómini

ómnibus diébus vitæ meæ (T.P. allelúia).

Divíni múneris participatióne refécti,

quæsumus, Dómine Deus noster,

ut, exémplo beátæ N.,

mortificatiónem Iesu in córpore nostro circumferéntes,

tibi soli adhærére studeámus.

Per Christum.