Gaudeámus et exsultémus, quia Dóminus ómnium

diléxit vírginem sanctam atque gloriósam (T.P. allelúia).

Haec est virgo sápiens,

quam Dóminus vigilántem invénit,

quae accéptis lampádibus sumpsit secum óleum

et, veniénte Dómino,

introívit cum eo ad núptias (T.P. allelúia).

Dómine Deus, qui beátam N. vírginem

cæléstibus donis cumulásti,

tríbue, quæsumus, ut, eius virtútes æmulántes in terris,

gáudiis cum ipsa perfruámur ætérnis.

Per Dóminum.

Fac, Dómine Deus noster, ut beáta virgo N.,

sponsa tibi fidélis,

divínæ caritátis flammam éxcitet in córdibus nostris,

quam, ad perénnem Ecclésiæ tuæ glóriam,

áliis virgínibus inséruit.

Per Dóminum.

Dicátæ, quæsumus, Dómine, capiámus oblatiónis efféctum,

ut, beátæ N. exémplo,

terrénæ vetustátis conversatióne mundáti,

cæléstis vitæ proféctibus innovémur.

Per Christum.

Vere dignum et iustum est, æquum et salutáre,

nos tibi semper et ubíque grátias ágere:

Dómine, sancte Pater, omnípotens ætérne Deus:

In Sanctis enim, qui Christo se dedicavérunt

propter regnum cælórum,

tuam decet providéntiam celebráre mirábilem,

qua humánam substántiam

et ad primæ oríginis révocas sanctitátem,

et perdúcis ad experiénda dona,

quæ in novo sæculo sunt habénda.

Et ídeo, cum Sanctis et Angelis univérsis,

te collaudámus, sine fine dicéntes:

Sanctus, Sanctus, Sanctus Dóminus Deus Sábaoth.

Pleni sunt cæli et terra glória tua.

Hosánna in excélsis.

Benedíctus qui venit in nómine Dómini.

Hosánna in excélsis.

Quinque prudéntes vírgines accepérunt óleum

in vasis suis cum lampádibus.

Média autem nocte clamor factus est:

Ecce sponsus venit,

exíte óbviam Christo Dómino (T.P. allelúia).

Córporis et Sánguinis Unigéniti tui sacra percéptio, Dómine,

ab ómnibus nos cadúcis rebus avértat,

ut exémplo beátæ N. valeámus

tui et sincéra in terris caritáte profícere,

et perpétua in cælis visióne gaudére.

Per Christum.