Réquiem ætérnam dona eis, Dómine,

et lux perpétua lúceat eis.

Deus, Pater omnípotens,

cuius Fílium mórtuum fuísse et resurrexísse

fides nostra fatétur, concéde propítius,

ut hoc mystério fámulus tuus N.,

qui in illo dormívit,

per illum resúrgere lætétur.

Qui tecum.

Deus, cui próprium est miseréri semper et párcere,

te súpplices exorámus pro fámulo tuo N.,

quem (hódie) ad te migráre iussísti,

ut, quia in te sperávit et crédidit,

concédas eum ad veram pátriam perdúci,

et gáudiis pérfrui sempitérnis.

Per Dóminum.

Pro fámuli tui N. salúte

hóstias tibi, Dómine, supplíciter offérimus

tuam cleméntiam deprecántes,

ut, qui Fílium tuum pium Salvatórem esse non dubitávit,

misericórdem Iúdicem invéniat.

Qui vivit et regnat in sæcula sæculórum.

Lux ætérna lúceat eis, Dómine,

cum Sanctis tuis in ætérnum, quia pius es.

Réquiem ætérnam dona eis, Dómine,

et lux perpétua lúceat eis,

cum Sanctis tuis in ætérnum, quia pius es.

Dómine Deus, cuius Fílius in sacraménto Córporis sui

viáticum nobis relíquit,

concéde propítius, ut per hoc frater noster N.

ad ipsam Christi pervéniat mensam ætérnam.

Qui vivit et regnat in sæcula sæculórum.