Apériat ei Dóminus paradísi iánuam,

ut ad illam pátriam revertátur,

ubi mors non est, ubi ætérnum gáudium persevérat.

Deus, misericórdia peccatórum

et tuórum beatitúdo Sanctórum,

da, quæsumus, fámulo tuo N.,

cuius depositiónis (hódie) offícia humanitátis persólvimus,

cum eléctis tuis beáti múneris portiónem,

ut eum, a mortalitátis néxibus absolútum,

in die resurrectiónis ante fáciem tuam præsentári concédas.

Per Dóminum.

Deus, qui posuísti præséntis vitæ términum,

ut æternitátis réseres intróitum,

te súpplices deprecámur,

ut nomen fámuli tui N.

in libro vitæ miseratiónis tuæ gratia iúbeas cónscribi.

Per Dóminum.

Adésto, Dómine, quæsumus, pro fámulo tuo N.,

cuius in die depositiónis

hoc sacrifícium tibi placatiónis offérimus,

ut, si qua ei peccáti mácula inhæsit

aut vítium humánum infécit,

dono tuæ pietátis indúlgeas et abstérgeas.

Per Christum.

Salvatórem exspectámus

Dóminum nostrum Iesum Christum,

qui reformábit corpus humilitátis nostræ

configurátum córpori claritátis suæ.

Præsta, quæsumus, omnípotens Deus,

ut fámulus tuus N.,

qui (hódie) de hoc sæculo migrávit,

his sacrifíciis purgátus et a peccátis expedítus,

resurrectiónis suscípiat gáudia sempitérna.

Per Christum.