Redemísti nos, Dómine, in Sánguine tuo,

ex omni tribu et lingua et pópulo et natióne,

et fecísti nos Deo nostro regnum.

Deus, qui pretióso Unigéniti tui Sánguine

univérsos hómines redemísti,

consérva in nobis opus misericórdiæ tuæ,

ut, nostræ salútis mystérium iúgiter recoléntes,

eiúsdem fructum cónsequi mereámur.

Per Dóminum.

Maiestáti tuæ, Dómine,

oblatiónis nostræ múnera proferéntes,

ad novi testaménti Mediatórem Iesum

his mystériis accedámus,

eiúsque aspersiónem Sánguinis salutíferam innovémus.

Qui vivit et regnat in sæcula sæculórum.

Calix benedictiónis, cui benedícimus,

communicátio Sánguinis Christi est;

et panis, quem frángimus,

participátio Córporis Dómini est.

Cibo refécti, Dómine, potúque salútis,

Salvatóris nostri, quæsumus,

semper Sánguine perfundámur,

qui fons aquæ nobis fiat in vitam saliéntis ætérnam.

Per Christum.

Refécti cibo potúque cælésti, quæsumus, omnípotens Deus,

ut ab hóstium deféndas formídine,

quos pretióso Fílii tui Sánguine redemísti.

Qui vivit et regnat in sæcula sæculórum.