Dicit Dóminus Simóni Petro:

Ego rogávi pro te, ut non defíciat fides tua,

et tu aliquándo convérsus confírma fratres tuos.

Præsta, quæsumus, omnípotens Deus,

ut nullis nos permíttas perturbatiónibus cóncuti,

quos in apostólicæ confessiónis petra solidásti.

Per Dóminum.

Ecclésiæ tuæ, quæsumus, Dómine,

preces et hóstias benígnus admítte,

ut, beáto Petro pastóre,

ad ætérnam pervéniat hereditátem,

quo docénte fídei tenet integritátem.

Per Christum.

Dixit Petrus ad Iesum: Tu es Christus, Fílius Dei vivi.

Respondit Iesus: Tu es Petrus,

et super hanc petram ædificábo Ecclésiam meam.

Deus, qui nos,

beáti Petri apóstoli festivitátem celebrántes,

Christi Córporis et Sánguinis communióne vegetásti,

præsta, quæsumus,

ut hoc redemptiónis commércium

sit sacraméntum nobis unitátis et pacis.

Per Christum.