Ecce fidélis servus et prudens,

quem constítuit Dóminus super famíliam suam.

Præsta, quæsumus, omnípotens Deus,

ut humánæ salútis mystéria,

cuius primórdia beáti Ioseph fidéli custódiæ commisísti,

Ecclésia tua, ipso intercedénte, iúgiter servet implénda.

Per Dóminum.

Quæsumus, Dómine, ut, sicut beátus Ioseph

Unigénito tuo, nato de María Vírgine,

pia devotióne desérviit,

ita et nos mundo corde

tuis altáribus mereámur ministráre.

Per Christum.

Vere dignum et iustum est, æquum et salutáre,

nos tibi semper et ubíque grátias ágere:

Dómine, sancte Pater, omnípotens ætérne Deus:

débitis magnificáre præcóniis, benedícere et prædicáre.

Qui et vir iustus, a te Deíparæ Vírgini Sponsus est datus,

et fidélis servus ac prudens,

super Famíliam tuam est constitútus,

ut Unigénitum tuum,

Sancti Spíritus obumbratióne concéptum,

patérna vice custodíret,

Iesum Christum Dóminum nostrum.

adórant Dominatiónes, tremunt Potestátes.

Cæli cælorúmque Virtútes, ac beáta Séraphim,

sócia exsultatióne concélebrant.

Cum quibus et nostras voces ut admítti iúbeas, deprecámur,

súpplici confessióne dicéntes:

Pleni sunt cæli et terra glória tua.

Hosánna in excélsis.

Benedíctus qui venit in nómine Dómini.

Hosánna in excélsis.

Euge, serve bone et fidélis: intra in gáudium Dómini tui.

Famíliam tuam, quæsumus, Dómine,

quam de beáti Ioseph sollemnitáte lætántem

ex huius altáris alimónia satiásti,

perpétua protectióne defénde,

et tua in ea propitiátus dona custódi.

Per Christum.