Die 19 martii
S. IOSEPH, SPONSI BEATÆ MARIÆ VIRGINIS
Sollemnitas
Léctio libri secúndi Samuélis 7, 4-5a.12-14a.16
FRA •
L/F •
CMT
In diebus illis:
Ecce sermo Domini ad Nathan dicens: « Vade et loquere ad servum meum David: Hæc dicit Dominus: Cumque completi fuerint dies tui, et dormieris cum patribus tuis, suscitabo semen tuum post te, quod egredietur de visceribus tuis; et firmabo regnum eius. Ipse ædificabit domum nomini meo, et stabiliam thronum regni eius usque in sempiternum. Ego ero ei in patrem, et ipse erit mihi in filium. Et stabilis erit domus tua et regnum tuum usque in æternum ante faciem meam, et thronus tuus erit firmus iugiter ».
Psalmus responsorius 89(88), 2-3, 4-5, 27.29
FRA •
L/F •
CMTR/ Semen eius in ætérnum manébit.
Misericordias Domini in æternum cantabo;
in generationem et generationem annuntiabo veritatem tuam in ore meo.
Quoniam dixisti: « In æternum misericordia ædificabitur »,
in cælis firmabitur veritas tua.
« Disposui testamentum electo meo,
iuravi David servo meo:
Usque in æternum confirmabo semen tuum
et ædificabo in generationem et generationem sedem tuam ».
Ipse invocabit me: “Pater meus es tu,
Deus meus et refugium salutis meæ”.
In æternum servabo illi misericordiam meam;
et testamentum meum fidele ipsi.
Léctio Epístolæ béati Pauli apóstoli ad Romános 4, 13.16-18.22
FRA •
L/F •
CMT
Fratres:
Non per legem promissio Abrahæ aut semini eius, ut heres esset mundi, sed per iustitiam fidei. Ideo ex fide, ut secundum gratiam, ut firma sit promissio omni semini, non ei, qui ex lege est solum, sed et ei, qui ex fide est Abrahæ — qui est pater omnium nostrum, sicut scriptum est: « Patrem multarum gentium posui te » —, ante Deum, cui credidit, qui vivificat mortuos et vocat ea, quæ non sunt, quasi sint; qui contra spem in spe credidit, ut fieret pater multarum gentium, secundum quod dictum est: « Sic erit semen tuum ». Ideo et reputatum est illi ad iustitiam.
(Allelúia)
Beáti qui hábitant in domo tua, Dómine, in perpétuum laudábunt te.
Léctio sancti Evangélii secúndum Matthæum 1, 16.18-21.24a
vel •
FRA •
L/F •
CMT
Iacob genuit Ioseph virum Mariæ, de qua natus est Iesus, qui vocatur Christus.
Iesu Christi autem generatio sic erat. Cum esset desponsata mater eius Maria Ioseph, antequam convenirent inventa est in utero habens de Spiritu Sancto. Ioseph autem vir eius, cum esset iustus et nollet eam traducere, voluit occulte dimittere eam. Hæc autem eo cogitante, ecce angelus Domini in somnis apparuit ei dicens: « Ioseph fili David, noli timere accipere Mariam coniugem tuam. Quod enim in ea natum est, de Spiritu Sancto est; pariet autem filium, et vocabis nomen eius Iesum: ipse enim salvum faciet populum suum a peccatis eorum ».
Exsurgens autem Ioseph a somno fecit, sicut præcepit ei angelus Domini, et accepit coniugem suam.
vel:
Léctio sancti Evangélii secúndum Lucam 2, 41-51a
FRA •
L/F
Ibant parentes Iesu per omnes annos in Ierusalem in die festo Paschæ. Et cum factus esset annorum duodecim, ascendentibus illis secundum consuetudinem diei festi, consummatisque diebus, cum redirent, remansit puer Iesus in Ierusalem, et non cognoverunt parentes eius. Existimantes autem illum esse in comitatu, venerunt iter diei et requirebant eum inter cognatos et notos; et non invenientes regressi sunt in Ierusalem requirentes eum.
Et factum est, post triduum invenerunt illum in templo sedentem in medio doctorum, audientem illos et interrogantem eos; stupebant autem omnes, qui eum audiebant, super prudentia et responsis eius. Et videntes eum admirati sunt, et dixit Mater eius ad illum: « Fili, quid fecisti nobis sic? Ecce pater tuus et ego dolentes quærebamus te ».
Et ait ad illos: « Quid est quod me quærebatis? Nesciebatis quia in his, quæ Patris mei sunt, oportet me esse? ». Et ipsi non intellexerunt verbum, quod locutus est ad illos.
Et descendit cum eis et venit Nazareth et erat subditus illis.