Die 25 martii
IN ANNUNTIATIONE DOMINI
Sollemnitas
Quoties sollemnitas infra Hebdomadam Sanctam occurrit, ad feriam secundam post dominicam II Paschæ transfertur.
Hebr 10, 5.7
Dóminus ingrédiens mundum dixit:
Ecce vénio ut fáciam, Deus, voluntátem tuam.
Deus, qui Verbum tuum in útero Vírginis Maríæ
veritátem carnis humánæ suscípere voluísti,
concéde, quæsumus,
ut, qui Redemptórem nostrum
Deum et hóminem confitémur,
ipsíus étiam divínæ natúræ mereámur esse consórtes.
Per Dóminum.
Ecclésiæ tuæ munus, omnípotens Deus, dignáre suscípere,
ut, quæ in Unigéniti tui incarnatióne
primórdia sua constáre cognóscit,
ipsíus gáudeat hac sollemnitáte celebráre mystéria.
Per Christum.
Præfatio: De mysterio Incarnationis.
FRA •
L/F
V. Dóminus vobíscum.
R. Et cum spíritu tuo.
V. Sursum corda.
R. Habémus ad Dóminum.
V. Grátias agámus Dómino Deo nostro.
R. Dignum et iustum est.
Vere dignum et iustum est, æquum et salutáre,
nos tibi semper et ubíque grátias ágere:
Dómine, sancte Pater, omnípotens ætérne Deus:
per Christum Dóminum nostrum.
Quem inter hómines et propter hómines nascitúrum,
Spíritus Sancti obumbránte virtúte,
a cælésti núntio Virgo fidénter audívit
et immaculátis viscéribus amánter portávit,
ut et promissiónes fíliis Israel perfíceret véritas,
et géntium exspectátio patéret ineffabíliter adimplénda.
Per quem maiestátem tuam adórat exércitus Angelórum,
ante conspéctum tuum in æternitáte lætántium.
Cum quibus et nostras voces ut admítti iúbeas, deprecámur,
sócia exsultatióne dicéntes:
Sanctus, Sanctus, Sanctus Dóminus Deus Sábaoth.
Pleni sunt cæli et terra glória tua.
Hosánna in excélsis.
Benedíctus qui venit in nómine Dómini.
Hosánna in excélsis.
Is 7, 14
Ecce Virgo concípiet et páriet Fílium,
et vocábitur nomen eius Emmánuel.
In méntibus nostris, quæsumus, Dómine,
veræ fídei sacraménta confírma,
ut, qui concéptum de Vírgine
Deum verum et hóminem confitémur,
per eius salutíferæ resurrectiónis poténtiam,
ad ætérnam mereámur perveníre lætítiam.
Per Christum.
APRILIS