In médio Ecclésiæ apéruit os eius,

et implévit eum Dóminus spíritu sapiéntiæ et intelléctus,

stolam glóriæ índuit eum, allelúia.

Omnípotens sempitérne Deus,

qui beátum Athanásium epíscopum

divinitátis Fílii tui propugnatórem exímium suscitásti,

concéde propítius,

ut, eius doctrína et protectióne gaudéntes,

in tui cognitióne et amóre sine intermissióne crescámus.

Per Dóminum.

Réspice, Dómine, múnera

quæ tibi in commemoratióne beáti Athanásii perhibémus,

eiúsque fidem profiténtibus illibátam

tuæ testificátio veritátis prosit ad salútem.

Per Christum.

Fundaméntum áliud nemo potest pónere,

præter id quod pósitum est, quod est Christus Iesus,

allelúia.

Da nobis, quæsumus, omnípotens Deus,

ut Unigéniti tui vera divínitas,

quam cum beáto Athanásio fírmiter confitémur,

per hoc sacraméntum vivíficet nos semper et múniat.

Per Christum.