Veníte, audíte, et narrábo, omnes qui timétis Deum,

quanta fecit Dóminus ánimæ meæ (T.P. allelúia).

Omnípotens sempitérne Deus,

qui beátam Vírginem Maríam, Fílium tuum gestántem,

ad visitándam Elísabeth inspirásti,

præsta, quæsumus, ut, afflánti Spirítui obsequéntes,

cum ipsa te semper magnificáre possímus.

Per Dóminum.

Maiestáti tuæ, Dómine,

hoc nostrum gratum sit sacrifícium salutáre,

sicut beatíssimæ Unigéniti tui Matris

habuísti acceptábilem caritátem. Per Christum.

Beátam me dicent omnes generatiónes,

quia fecit mihi magna qui potens est,

et sanctum nomen eius (T.P. allelúia).

Magníficet te, Deus, Ecclésia tua

qui tuis fecísti magna fidélibus,

et, quem laténtem beátus Ioánnes

cum exsultatióne præsénsit,

eúndem semper vivéntem

cum lætítia in hoc percípiat sacraménto.

Qui vivit et regnat in sæcula sæculórum.