Die 31 maii
IN VISITATIONE BEATE MARIÆ VRIGINIS
Festum
Lauda, filia Sion; iubilate, Israel! Lætare et exsulta in omni corde, filia Ierusalem! Abstulit Dominus iudicium tuum, avertit inimicos tuos; rex Israel, Dominus, in medio tui, non timebis malum ultra.
In die illa dicetur Ierusalem: « Noli timere, Sion; ne dissolvantur manus tuæ! Dominus Deus tuus in medio tui, fortis ipse salvabit; gaudebit super te in lætitia, commotus in dilectione sua; exsultabit super te in laude sicut in die conventus ».
« Auferam a te calamitatem, ut non ultra habeas super ea opprobrium.
vel:
Léctio Epístolæ béati Pauli apóstoli ad Romános 12, 9-16b
FRA •
L/F •
CMT
Fratres:
Dilectio sine simulatione. Odientes malum, adhærentes bono; caritate fraternitatis invicem diligentes, honore invicem prævenientes, sollicitudine non pigri, spiritu ferventes, Domino servientes, spe gaudentes, in tribulatione patientes, orationi instantes, necessitatibus sanctorum communicantes, hospitalitatem sectantes.
Benedicite persequentibus; benedicite et nolite maledicere!
Gaudere cum gaudentibus, flere cum flentibus. Idipsum invicem sentientes, non alta sapientes, sed humilibus consentientes.
Psalmus responsorius : Liber Isaíæ prophétæ 12, 2-3, 4bcd, 5-6
FRA •
L/F •
CMTR/ Magnus in médio tui Sanctus Israel.
« Ecce Deus salutis meæ;
fiducialiter agam et non timebo,
quia fortitudo mea et laus mea Dominus,
et factus est mihi in salutem ».
Et haurietis aquas in gaudio de fontibus salutis.
« Confitemini Domino et invocate nomen eius,
notas facite in populis adinventiones eius;
mementote quoniam excelsum est nomen eius.
Cantate Domino, quoniam magnifice fecit;
notum sit hoc in universa terra.
Exsulta et lauda, quæ habitas in Sion,
quia magnus in medio tui Sanctus Israel ».
Allelúia
Beáta es, Virgo María, quæ credidísti, quóniam perficiéntur ea quæ dicta sunt tibi a Dómino.
Léctio sancti Evangélii secúndum Lucam 1, 39-56
FRA •
L/F •
CMT
Exsurgens Maria in diebus illis abiit in montana cum festinatione in civitatem Iudæ et intravit in domum Zachariæ et salutavit Elisabeth.
Et factum est, ut audivit salutationem Mariæ Elisabeth, exsultavit infans in utero eius, et repleta est Spiritu Sancto Elisabeth et exclamavit voce magna et dixit:
« Benedicta tu inter mulieres, et benedictus fructus ventris tui. Et unde hoc mihi, ut veniat mater Domini mei ad me? Ecce enim ut facta est vox salutationis tuæ in auribus meis, exsultavit in gaudio infans in utero meo. Et beata, quæ credidit, quoniam perficientur ea, quæ dicta sunt ei a Domino ».
Et ait Maria:
« Magnificat anima mea Dominum, et exsultavit spiritus meus in Deo salvatore meo, quia respexit humilitatem ancillæ suæ. Ecce enim ex hoc beatam me dicent omnes generationes, quia fecit mihi magna, qui potens est, et sanctum nomen eius, et misericordia eius in progenies et progenies timentibus eum.
Fecit potentiam in brachio suo, dispersit superbos mente cordis sui; deposuit potentes de sede et exaltavit humiles; esurientes implevit bonis et divites dimisit inanes.
Suscepit Israel puerum suum, recordatus misericordiæ, sicut locutus est ad patres nostros, Abraham et semini eius in sæcula ».
Mansit autem Maria cum illa quasi mensibus tribus et reversa est in domum suam.