Isti sunt viri sancti,

quos elégit Dóminus in caritáte non ficta,

et dedit illis glóriam sempitérnam.

Deus, qui nos per beátos Apóstolos

ad agnitiónem tui nóminis veníre tribuísti,

intercedéntibus sanctis Simóne et Iuda,

concéde propítius, ut semper augeátur Ecclésia

increméntis in te credéntium populórum.

Per Dóminum.

Glóriam, Dómine, sanctórum apostolórum Simónis et Iudæ

perpétuam venerántes,

quæsumus, ut vota nostra suscípias

et ad sacra mystéria celebránda nos digne perdúcas.

Per Christum.

Si quis díligit me, sermónem meum servábit, dicit Dóminus;

et Pater meus díliget eum, et ad eum veniémus,

et mansiónem apud eum faciémus.

Percéptis, Dómine, sacraméntis,

súpplices in Spíritu Sancto deprecámur,

ut, quæ pro apostolórum Simónis et Iudæ

veneránda gérimus passióne,

nos in tua dilectióne consérvent.

Per Christum.