Iste est Ioánnes,

qui supra pectus Dómini in cena recúbuit:

beátus Apóstolus, cui reveláta sunt secréta cæléstia,

et verba vitæ in toto terrárum orbe diffúdit.

In médio Ecclésiæ apéruit os eius,

et implévit eum Dóminus spíritu sapiéntiæ et intelléctus;

stolam glóriæ índuit eum.

Deus, qui per beátum apóstolum Ioánnem

Verbi tui nobis arcána reserásti,

præsta, quæsumus,

ut, quod ille nostris áuribus excellénter infúdit,

intellegéntiæ competéntis eruditióne capiámus.

Per Dóminum.

Múnera, quæsumus, Dómine, obláta sanctífica, et præsta,

ut ex huius cenæ convívio ætérni Verbi secréta hauriámus,

quæ ex eódem fonte apóstolo tuo Ioánni revelásti.

Per Christum.

Verbum caro factum est, et habitávit in nobis.

Et de plenitúdine eius nos omnes accépimus.

Præsta, quæsumus, omnípotens Deus,

ut Verbum caro factum,

quod beátus Ioánnes apóstolus prædicávit,

per hoc mystérium quod celebrávimus

hábitet semper in nobis.

Qui vivit et regnat in sæcula sæculórum.