Pópulus qui ambulábat in ténebris, vidit lucem magnam;

habitántibus in regióne umbræ mortis, lux orta est eis.

Concéde nobis, omnípotens Deus, ut salutáre tuum,

quod ad redemptiónem mundi luce nova cælórum procéssit,

nostris semper innovándis córdibus oriátur.

Per Dóminum.

Deus, auctor sincéræ devotiónis et pacis,

da, quæsumus, ut et maiestátem tuam

conveniénter hoc múnere venerémur,

et sacri participatióne mystérii fidéliter sénsibus uniámur.

Per Christum.

Vita manifestáta est, quæ erat apud Patrem,

et appáruit nobis.

Divérsis plebs tua, Dómine, gubernáta subsídiis,

et præséntia pietátis tuæ remédia cápiat et futúra,

ut, transeúntium rerum necessária consolatióne fovénte,

fiduciálius ad ætérna conténdat.

Per Christum.