Nascétur nobis párvulus, et vocábitur Deus, Fortis;

in ipso benedicéntur omnes tribus terræ.

Omnípotens sempitérne Deus,

nativitátem Fílii tui secúndum carnem

propinquáre cernéntes,

quæsumus, ut nobis indígnis fámulis tuis

misericórdiam præstet Verbum,

quod ex Vírgine María dignátum est caro fíeri,

et in nobis habitáre Iesus Christus, Dóminus noster.

Qui tecum.

Hæc oblátio, qua divíni cultus nobis est índita plenitúdo,

sit tibi, Dómine, perfécta placátio,

ut nostri Redemptóris exórdia

purificátis méntibus celebrémus.

Per Christum.

Ecce sto ad óstium et pulso:

si quis audíerit vocem meam, et aperúerit mihi iánuam,

intrábo ad illum, et cenábo cum illo, et ipse mecum.

Cælésti múnere satiátis, Dómine,

pacem tuam propitiátus indúlge,

ut Fílio tuo dilectíssimo veniénti

accénsis lampádibus digni præstolémur occúrsum.

Per Christum.