In nómine Iesu omne genu flectátur,

cæléstium, terréstrium et infernórum:

quia Dóminus factus est obœdiens usque ad mortem,

mortem autem crucis:

ídeo Dóminus Iesus Christus in glória est Dei Patris.

Deus, qui pro nobis Fílium tuum

crucis patíbulum subíre voluísti,

ut inimíci a nobis expélleres potestátem,

concéde nobis fámulis tuis,

ut resurrectiónis grátiam consequámur.

Per Dóminum.

Súscipe, quæsumus, Dómine, munus oblátum,

et dignánter operáre,

ut, quod gérimus Fílii tui mystério passiónis,

piis efféctibus consequámur.

Per Christum.

Fílius hóminis non venit ministrári, sed ministráre,

et dare ánimam suam redemptiónem pro multis.

Largíre sénsibus nostris, omnípotens Deus,

ut per temporálem Fílii tui mortem,

quam mystéria veneránda testántur,

vitam te nobis dedísse perpétuam confidámus.

Per Christum.

Da, quæsumus, Dómine, fidélibus tuis

et sine cessatióne cápere paschália sacraménta,

et desideránter exspectáre dona ventúra,

ut, mystériis quibus renáti sunt permanéntes,

ad novam vitam his opéribus perducántur.

Per Christum.