Verba mea áuribus pércipe, Dómine,

intéllege clamórem meum.

Inténde voci oratiónis meæ, Rex meus et Deus meus.

Largíre nobis, quæsumus, Dómine,

semper spíritum cogitándi quæ recta sunt,

prómptius et agéndi,

ut, qui sine te esse non póssumus,

secúndum te vívere valeámus.

Per Dóminum.

Súpplicum votis, Dómine, esto propítius,

et, pópuli tui oblatiónibus precibúsque suscéptis,

ómnium nostrum ad te corda convérte.

Per Christum.

Omnis qui petit áccipit, et qui quærit ínvenit,

et pulsánti aperiétur.

Quæsumus, Dómine Deus noster,

ut sacrosáncta mystéria,

quæ pro reparatiónis nostræ munímine contulísti,

et præsens nobis remédium esse fácias et futúrum.

Per Christum.

Advéniat, quæsumus, Dómine,

misericórdia speráta supplícibus,

et eísdem cæléstis munificéntia tribuátur,

qua et recte poscénda cognóscant

et postuláta percípiant.

Per Christum.