Lex Dómini irreprehensíbilis, convértens ánimas;

testimónium Dómini fidéle, sapiéntiam præstans párvulis.

Ad te corda nostra, Pater ætérne, convérte,

ut nos, unum necessárium semper quæréntes

et ópera caritátis exercéntes,

tuo cúltui præstes esse dicátos.

Per Dóminum.

Hæc quæ nos réparent, quæsumus, Dómine, beáta mystéria

suo nos múnere dignos effíciant.

Per Christum.

Estóte perfécti,

sicut et Pater vester cæléstis perféctus est, dicit Dóminus.

Perpétuo, Dómine, favóre proséquere,

quos réficis divíno mystério,

et, quos imbuísti cæléstibus institútis,

salutáribus comitáre soláciis.

Per Christum.

Fidéles tuos, Deus, benedíctio desideráta confírmet,

quæ eos et a tua voluntáte numquam fáciat discrepáre,

et tuis semper indúlgeat benefíciis gratulári.

Per Christum.

Tibi dixit cor meum quæsívi vultum tuum,

vultum tuum, Dómine, requíram.

Ne avértas fáciem tuam a me.

Reminíscere miseratiónum tuárum, Dómine,

et misericórdiæ tuæ, quæ a sæculo sunt.

Ne umquam dominéntur nobis inimíci nostri;

líbera nos, Deus Israel, ex ómnibus angústiis nostris.

Deus, qui nobis diléctum Fílium tuum audíre præcepísti,

verbo tuo intérius nos páscere dignéris,

ut, spiritáli purificáto intúitu,

glóriæ tuæ lætémur aspéctu.

Per Dóminum.

Hæc hóstia, Dómine, quæsumus, emúndet nostra delícta,

et ad celebránda festa paschália

fidélium tuórum córpora mentésque sanctíficet.

Per Christum.

Vere dignum et iustum est, æquum et salutáre,

nos tibi semper et ubíque grátias ágere:

Dómine, sancte Pater, omnípotens ætérne Deus:

per Christum Dóminum nostrum.

Qui, própria morte prænuntiáta discípulis,

in monte sancto suam eis apéruit claritátem,

ut per passiónem, étiam lege prophetísque testántibus,

ad glóriam resurrectiónis perveníri constáret.

Et ídeo cum cælórum virtútibus

in terris te iúgiter celebrámus,

maiestáti tuæ sine fine clamántes:

Sanctus, Sanctus, Sanctus Dóminus Deus Sábaoth.

Pleni sunt cæli et terra glória tua.

Hosánna in excélsis.

Benedíctus qui venit in nómine Dómini.

Hosánna in excélsis.

Hic est Fílius meus diléctus,

in quo mihi bene complácui;

ipsum audíte.

Percipiéntes, Dómine, gloriósa mystéria,

grátias tibi reférre satágimus,

quod, in terra pósitos,

iam cæléstium præstas esse partícipes.

Per Christum.

Bénedic, Dómine, fidéles tuos benedictióne perpétua,

et fac eos Unigéniti tui Evangélio sic adhærére,

ut ad illam glóriam, cuius in se spéciem Apóstolis osténdit,

et suspiráre iúgiter et felíciter váleant perveníre.

Per Christum.