Réspice, Dómine, in testaméntum tuum,

et ánimas páuperum tuórum ne derelínquas in finem.

Exsúrge, Dómine, et iúdica causam tuam,

et ne obliviscáris voces quæréntium te.

Omnípotens sempitérne Deus,

quem, docénte Spíritu Sancto,

patérno nómine invocáre præsúmimus,

pérfice in córdibus nostris spíritum adoptiónis filiórum,

ut promíssam hereditátem íngredi mereámur.

Per Dóminum.

Ecclésiæ tuæ, Dómine, múnera placátus assúme,

quæ et miséricors offerénda tribuísti,

et in nostræ salútis poténter éfficis transíre mystérium.

Per Christum.

Lauda, Ierúsalem, Dóminum,

qui ádipe fruménti sátiat te.

Panis, quem ego dédero,

caro mea est pro sæculi vita,

dicit Dóminus.

Sacramentórum tuórum, Dómine,

commúnio sumpta nos salvet,

et in tuæ veritátis luce confírmet.

Per Christum.