Protéctor noster, áspice, Deus,

et réspice in fáciem Christi tui,

quia mélior est dies una in átriis tuis super míllia.

Deus, qui diligéntibus te bona invisibília præparásti,

infúnde córdibus nostris tui amóris afféctum,

ut, te in ómnibus et super ómnia diligéntes,

promissiónes tuas, quæ omne desidérium súperant,

consequámur.

Per Dóminum.

Súscipe, Dómine, múnera nostra,

quibus exercéntur commércia gloriósa,

ut, offeréntes quæ dedísti,

teípsum mereámur accípere.

Per Christum.

Apud Dóminum misericórdia,

et copiósa apud eum redémptio.

Ego sum panis vivus, qui de cælo descéndi, dicit Dóminus:

si quis manducáverit ex hoc pane, vivet in ætérnum.

Per hæc sacraménta, Dómine, Christi partícipes effécti,

cleméntiam tuam humíliter implorámus,

ut, eius imáginis confórmes in terris,

et eius consórtes in cælis fíeri mereámur.

Qui vivit et regnat in sæcula sæculórum.