Inclína, Dómine, aurem tuam ad me, et exáudi me.

Salvum fac servum tuum, Deus meus, sperántem in te.

Miserére mihi, Dómine, quóniam ad te clamávi tota die.

Deus, qui fidélium mentes uníus éfficis voluntátis,

da pópulis tuis id amáre quod præcipis,

id desideráre quod promíttis,

ut, inter mundánas varietátes,

ibi nostra fixa sint corda, ubi vera sunt gáudia.

Per Dóminum.

Qui una semel hóstia, Dómine,

adoptiónis tibi pópulum acquisísti,

unitátis et pacis in Ecclésia tua

propítius nobis dona concédas.

Per Christum.

De fructu óperum tuórum, Dómine, satiábitur terra,

ut edúcas panem de terra, et vinum lætíficet cor hóminis.

Qui mandúcat meam carnem et bibit meum sánguinem,

habet vitam ætérnam, dicit Dóminus;

et ego resuscitábo eum in novíssimo die.

Plenum, quæsumus, Dómine,

in nobis remédium tuæ miseratiónis operáre,

ac tales nos esse pérfice propítius et sic fovéri,

ut tibi in ómnibus placére valeámus.

Per Christum.