Da pacem, Dómine, sustinéntibus te,

ut prophétæ tui fidéles inveniántur;

exáudi preces servi tui, et plebis tuæ Israel.

Réspice nos, rerum ómnium Deus creátor et rector,

et, ut tuæ propitiatiónis sentiámus efféctum,

toto nos tríbue tibi corde servíre.

Per Dóminum.

Propitiáre, Dómine, supplicatiónibus nostris,

et has oblatiónes famulórum tuórum benígnus assúme,

ut, quod sínguli ad honórem tui nóminis obtulérunt,

cunctis profíciat ad salútem.

Per Christum.

Quam pretiósa est misericórdia tua, Deus!

Fílii hóminum sub umbra alárum tuárum confúgient.

Calix benedictiónis, cui benedícimus,

communicátio Sánguinis Christi est;

et panis, quem frángimus, participátio Córporis Dómini est.

Mentes nostras et córpora possídeat,

quæsumus, Dómine, doni cæléstis operátio,

ut non noster sensus in nobis,

sed eius prævéniat semper efféctus.

Per Christum.