Si iniquitátes observáveris, Dómine,

Dómine, quis sustinébit?

Quia apud te propitiátio est, Deus Israel.

Tua nos, quæsumus, Dómine, grátia

semper et prævéniat et sequátur,

ac bonis opéribus iúgiter præstet esse inténtos.

Per Dóminum.

Súscipe, Dómine,

fidélium preces cum oblatiónibus hostiárum,

ut, per hæc piæ devotiónis offícia,

ad cæléstem glóriam transeámus.

Per Christum.

Dívites eguérunt et esuriérunt;

quæréntes autem Dóminum non minuéntur omni bono.

Cum apparúerit Dóminus, símiles ei érimus,

quóniam vidébimus eum sícuti est.

Maiestátem tuam, Dómine, supplíciter deprecámur,

ut, sicut nos Córporis et Sánguinis sacrosáncti

pascis aliménto,

ita divínæ natúræ fácias esse consórtes.

Per Christum.