Cantáte Dómino cánticum novum,

cantáte Dómino, omnis terra.

Conféssio et pulchritúdo in conspéctu eius,

sánctitas et magnificéntia in sanctificatióne eius.

Omnípotens sempitérne Deus,

dírige actus nostros in beneplácito tuo,

ut in nómine dilécti Fílii tui

mereámur bonis opéribus abundáre.

Per Dóminum.

Múnera nostra, Dómine, súscipe placátus,

quæ sanctificándo nobis, quæsumus,

salutária fore concéde.

Per Christum.

Accédite ad Dóminum et illuminámini,

et fácies vestræ non confundéntur.

Ego sum lux mundi, dicit Dóminus;

qui séquitur me, non ámbulat in ténebris,

sed habébit lumen vitæ.

Præsta nobis, quæsumus, omnípotens Deus,

ut, vivificatiónis tuæ grátiam consequéntes,

in tuo semper múnere gloriémur.

Per Christum.