Misericórdia Dómini plena est terra;

verbo Dómini cæli firmáti sunt, allelúia.

Omnípotens sempitérne Deus,

deduc nos ad societátem cæléstium gaudiórum,

ut eo pervéniat humílitas gregis,

quo procéssit fortitúdo pastóris.

Per Dóminum.

Concéde, quæsumus, Dómine,

semper nos per hæc mystéria paschália gratulári,

ut contínua nostræ reparatiónis operátio

perpétuæ nobis fiat causa lætítiæ.

Per Christum.

Surréxit Pastor bonus,

qui ánimam suam pósuit pro óvibus suis,

et pro grege suo mori dignátus est, alléluia.

Gregem tuum, Pastor bone, placátus inténde,

et oves, quas pretióso Fílii tui sánguine redemísti,

in ætérnis páscuis collocáre dignéris.

Per Christum.