Repleátur os meum laude tua, ut possim cantáre;

gaudébunt lábia mea, dum cantávero tibi, allelúia.

Deus, innocéntiæ restitútor et amátor,

dírige ad te tuórum corda famulórum,

ut, quos de incredulitátis ténebris liberásti,

numquam a tuæ veritátis luce discédant.

Per Dóminum.

Concéde, quæsumus, Dómine,

semper nos per hæc mystéria paschália gratulári,

ut contínua nostræ reparatiónis operátio

perpétuæ nobis fiat causa lætítiæ.

Per Christum.

Surréxit Dóminus et illúxit nobis,

quos redémit sánguine suo, allelúia.

Exáudi, Dómine, preces nostras,

ut redemptiónis nostræ sacrosáncta commércia

et vitæ nobis cónferant præséntis auxílium

et gáudia sempitérna concílient.

Per Christum.