Feria secunda
Hebdomadæ sanctæ
Léctio libri Isaíæ prophétæ 42, 1-7
FRA •
L/F •
CMT
Ecce servus meus, suscipiam eum; electus meus, complacet sibi in illo anima mea; dedi spiritum meum super eum, iudicium gentibus proferet. Non clamabit neque vociferabitur, nec audietur vox eius foris. Calamum quassatum non conteret et linum fumigans non exstinguet; in veritatem proferet iudicium. Non languebit nec frangetur, donec ponat in terra iudicium; et legem eius insulæ exspectant.
Hæc dicit Dominus Deus, creans cælos et extendens eos, firmans terram et quæ germinant ex ea, dans flatum populo, qui est super eam, et spiritum calcantibus eam: « Ego, Dominus, vocavi te in iustitia et apprehendi manum tuam; et formavi te et dedi te in fœdus populi, in lucem gentium, ut aperires oculos cæcorum et educeres de conclusione vinctum, de domo carceris sedentes in tenebris.
Psalmus responsorius 27(26), 1, 2, 3, 13-14
FRA •
L/F •
CMTR/ Dóminus illuminátio mea et salus mea.
Dominus illuminatio mea et salus mea; quem timebo?
Dominus protector vitæ meæ; a quo trepidabo?
Dum appropiant super me nocentes,
ut edant carnes meas;
qui tribulant me et inimici mei,
ipsi infirmati sunt et ceciderunt.
Si consistant adversum me castra,
non timebit cor meum;
si exsurgat adversum me prœlium, in hoc ego sperabo.
Credo videre bona Domini in terra viventium.
Exspecta Dominum, viriliter age,
et confortetur cor tuum, et sustine Dominum.
Ave, Rex noster: tu solus es miserátus erróres.
Léctio sancti Evangélii secúndum Ioánnem 12, 1-11
FRA •
L/F •
CMT
Ante sex dies Paschæ venit Iesus Bethaniam, ubi erat Lazarus, quem suscitavit a mortuis Iesus. Fecerunt ergo ei cenam ibi, et Martha ministrabat, Lazarus vero unus erat ex discumbentibus cum eo. Maria ergo accepit libram unguenti nardi puri, pretiosi, et unxit pedes Iesu et extersit capillis suis pedes eius; domus autem impleta est ex odore unguenti.
Dicit autem Iudas Iscariotes, unus ex discipulis eius, qui erat eum traditurus: « Quare hoc unguentum non veniit trecentis denariis et datum est egenis? ». Dixit autem hoc, non quia de egenis pertinebat ad eum, sed quia fur erat et, loculos habens, ea, quæ mittebantur, portabat.
Dixit ergo Iesus: « Sine illam, ut in diem sepulturæ meæ servet illud. Pauperes enim semper habetis vobiscum, me autem non semper habetis ».
Cognovit ergo turba multa ex Iudæis quia illic est, et venerunt non propter Iesum tantum, sed ut et Lazarum viderent, quem suscitavit a mortuis. Cogitaverunt autem principes sacerdotum, ut et Lazarum interficerent, quia multi propter illum abibant ex Iudæis et credebant in Iesum.