Iúdica, Dómine, nocéntes me,

expúgna impugnántes me:

apprehénde arma et scutum,

et exsúrge in adiutórium meum,

Dómine, virtus salútis meæ.

Da, quæsumus, omnípotens Deus,

ut, qui ex nostra infirmitáte defícimus,

intercedénte Unigéniti Fílii tui passióne, respirémus.

Qui tecum.

Réspice, Dómine, propítius sacra mystéria quæ gérimus,

et, quod ad nostra evacuánda præiudícia

miséricors prævidísti,

vitam nobis tríbue fructificáre perpétuam.

Per Christum.

Non avértas fáciem tuam a me;

in quacúmque die tríbulor, inclína ad me aurem tuam;

in quacúmque die invocávero te, velóciter exáudi me.

Vísita, quæsumus, Dómine, plebem tuam,

et corda sacris dicáta mystériis pietáte tuére pervígili,

ut remédia salútis ætérnæ,

quæ te miseránte pércipit,

te protegénte custódiat.

Per Christum.

Defénsio tua, Dómine, quæsumus, adsit humílibus,

et iúgiter prótegat in tua misericórdia confidéntes,

ut, ad festa paschália celebránda,

non solum observántiam corporálem,

sed, quod est pótius, hábeant méntium puritátem.

Per Christum.