Feria VI - Hebd I
Adventus
Léctio libri Isaíæ prophétæ 29, 17-24
FRA •
L/F •
CMT
Nonne adhuc in modico et in brevi convertetur Libanus in hortum, et hortus in saltum reputabitur? Et audient in die illa surdi verba libri, et de tenebris et caligine oculi cæcorum videbunt. Et addent mites in Domino lætitiam, et pauperrimi hominum in Sancto Israel exsultabunt; quoniam defecit, qui prævalebat, consummatus est illusor, et succisi sunt omnes, qui vigilabant super iniquitatem, qui peccare faciebant homines in verbo et arguentem in porta supplantabant et deiecerunt inanibus verbis iustum.
Propter hoc hæc dicit Dominus ad domum Iacob, qui redemit Abraham: « Non modo confundetur Iacob, nec modo vultus eius erubescet; sed, cum viderit opera manuum mearum, in medio sui sanctificabunt nomen meum et sanctificabunt Sanctum Iacob et Deum Israel pavebunt, et scient errantes spiritu sapientiam, et mussitatores discent doctrinam ».
Psalmus responsorius 27(26), 1, 4, 13-14
FRA •
L/F •
CMTR/ Dóminus illuminátio mea et salus mea.
Dominus illuminatio mea et salus mea; quem timebo?
Dominus protector vitæ meæ; a quo trepidabo?
Unum petii a Domino, hoc requiram:
ut inhabitem in domo Domini
omnibus diebus vitæ meæ,
ut videam voluptatem Domini
et visitem templum eius.
Credo videre bona Domini in terra viventium.
Exspecta Dominum, viriliter age,
et confortetur cor tuum, et sustine Dominum.
Allelúia
Ecce Dóminus noster cum virtúte véniet, et illuminábit óculos servórum suórum.
Léctio sancti Evangélii secúndum Matthæum 9, 27-31
FRA •
L/F •
CMT
In illo tempore:
Transeunte inde Iesu, secuti sunt eum duo cæci clamantes et dicentes: « Miserere nostri, fili David! ».
Cum autem venisset domum, accesserunt ad eum cæci, et dicit eis Iesus: « Creditis quia possum hoc facere? ».
Dicunt ei: «Utique, Domine».
Tunc tetigit oculos eorum dicens: «Secundum fidem vestram fiat vobis». Et aperti sunt oculi illorum.
Et comminatus est illis Iesus dicens: « Videte, ne quis sciat ». Illi autem exeuntes diffamaverunt eum in universa terra illa.