[Scripsit Darius rex ad duces regiones quæ est trans flumen dicens:] « Dimittite fieri templum Dei illud; dux Iudæorum et seniores eorum ædificent domum Dei illam in loco suo. Sed et a me præceptum est quomodo agere debeatis cum senioribus Iudæorum illis, qui ædificant domum Dei illam: ut de arca regis, id est de tributis, quæ dantur de regione trans flumen, studiose sumptus dentur viris illis sine intermissione. Ego Darius statui decretum, quod studiose impleri volo ».

Seniores autem Iudæorum prosperabantur in ædificatione iuxta prophetiam Aggæi prophetæ et Zachariæ filii Addo et perfecerunt ædificationem, iubente Deo Israel et iubente Cyro et Dario et Artaxerxe regibus Persarum, et compleverunt domum Dei istam die tertia mensis Adar, qui est annus sextus regni Darii regis.

Fecerunt autem filii Israel, sacerdotes et Levitæ et reliqui filiorum transmigrationis dedicationem domus Dei illius in gaudio. Et obtulerunt in dedicationem domus Dei illius boves centum, arietes ducentos, agnos quadringentos, hircos caprarum pro peccato totius Israel duodecim, iuxta numerum tribuum Israel. Et statuerunt sacerdotes in ordinibus suis et Levitas in vicibus suis in ministerium Dei in Ierusalem, sicut scriptum est in libro Moysi.

Fecerunt autem filii Israel transmigrationis Pascha quarta decima die mensis primi. Levitæ universi se purificaverunt; purificati autem cuncti immolaverunt Pascha universis filiis transmigrationis et fratribus suis sacerdotibus et sibi.

Venerunt ad Iesum mater et fratres eius, et non poterant adire ad eum præ turba. Et nuntiatum est illi: « Mater tua et fratres tui stant foris volentes te videre ».

Qui respondens dixit ad eos: « Mater mea et fratres mei hi sunt, qui verbum Dei audiunt et faciunt ».