Feria VI - Hebd XXV
Tempus « per annum » - Anno secundo
Léctio libri Ecclesiástes 3, 1-11
FRA •
L/F •
CMT
Omnia tempus habent, et momentum suum cuique negotio sub cælo: tempus nascendi et tempus moriendi, tempus plantandi et tempus evellendi quod plantatum est, tempus occidendi et tempus sanandi, tempus destruendi et tempus ædificandi, tempus flendi et tempus ridendi, tempus plangendi et tempus saltandi, tempus spargendi lapides et tempus eos colligendi, tempus amplexandi et tempus longe fieri ab amplexibus, tempus quærendi et tempus perdendi, tempus custodiendi et tempus abiciendi, tempus scindendi et tempus consuendi, tempus tacendi et tempus loquendi, tempus dilectionis et tempus odii, tempus belli et tempus pacis.
Quid lucri habet, qui operatur, de labore suo? Vidi occupationem, quam dedit Deus filiis hominum, ut occuparentur in ea.
Cuncta fecit bona in tempore suo; et mundum tradidit cordi eorum, et non inveniet homo opus, quod operatus est Deus ab initio usque ad finem.
Psalmus responsorius 144(143), 1a.2abc, 3-4
FRA •
L/F •
CMTR/ Benedíctus Dóminus, præsídium meum!
Benedictus Dominus, adiutor meus,
Misericordia mea et fortitudo mea,
refugium meum et liberator meus;
scutum meum, et in ipso speravi.
Domine, quid est homo, quod agnoscis eum,
aut filius hominis, quod reputas eum?
Homo vanitati similis factus est,
dies eius sicut umbra præteriens.
Allelúia
Fílius hóminis venit ut minstráret, et daret ánimam suam redemptiónem pro multis.
Léctio sancti Evangélii secúndum Lucam 9, 18-22
FRA •
L/F •
CMT
Factum est, cum solus esset Iesus orans, erant cum illo discipuli, et interrogavit illos dicens: « Quem me dicunt esse turbæ? ».
At illi responderunt et dixerunt: « Ioannem Baptistam, alii autem Eliam, alii vero: Propheta unus de prioribus surrexit ».
Dixit autem illis: « Vos autem quem me esse dicitis? ».
Respondens Petrus dixit: « Christum Dei ».
At ille increpans illos præcepit, ne cui dicerent hoc, dicens: « Oportet Filium hominis multa pati et reprobari a senioribus et principibus sacerdotum et scribis et occidi et tertia die resurgere ».