Feria IV - Hebd XXV
Tempus « per annum » - Anno secundo
Léctio libri Proverbiórum 30, 5-9
FRA •
L/F •
CMT
Omnis sermo Dei probatus clipeus est sperantibus in eum. Ne addas quidquam verbis illius: et arguaris inveniarisque mendax.
Duo rogavi te, ne deneges mihi, antequam moriar: vanitatem et verba mendacia longe fac a me, mendicitatem et divitias ne dederis mihi, tribue tantum victum demensum mihi, ne forte satiatus illiciar ad negandum et dicam: « Quis est Dominus? » aut egestate compulsus furer et periurem nomen Dei mei.
Psalmus responsorius 119(118), 29, 72, 89, 101, 104, 163
FRA •
L/F •
CMTR/ Lucérna pédibus meis verbum tuum, Dómine.
Viam mendacii averte a me
et legem tuam da mihi benigne.
Bonum mihi lex oris tui
super milia auri et argenti.
In æternum, Domine,
verbum tuum constitutum est in cælo.
Ab omni via mala prohibui pedes meos,
ut custodiam verba tua.
A mandatis tuis intellexi;
propterea odivi omnem viam mendacii.
Mendacium odio habui et abominatus sum;
legem autem tuam dilexi.
Allelúia
Appropinquávit regnum Dei; pænitémini et crédite Evangélio.
Léctio sancti Evangélii secúndum Lucam 9, 1-6
FRA •
L/F •
CMT
In illo tempore:
Convocatis Duodecim, dedit illis Iesus virtutem et potestatem super omnia dæmonia, et ut languores curarent, et misit illos prædicare regnum Dei et sanare infirmos; et ait ad illos:
« Nihil tuleritis in via, neque virgam neque peram neque panem neque pecuniam, neque duas tunicas habeatis. Et in quamcumque domum intraveritis, ibi manete et inde exite. Et quicumque non receperint vos, exeuntes de civitate illa pulverem pedum vestrorum excutite in testimonium supra illos ».
Egressi autem circumibant per castella evangelizantes et curantes ubique.