Dominica VII
Tempus paschale – Anno A
Léctio Actuum Apostolórum 1, 12-14
FRA •
L/F •
CMT
[Postquam assumptus est Iesus in cælum,] reversi sunt apostoli in Ierusalem a monte, qui vocatur Oliveti, qui est iuxta Ierusalem sabbati habens iter.
Et cum introissent, in cenaculum ascenderunt, ubi manebant et Petrus et Ioannes et Iacobus et Andreas, Philippus et Thomas, Bartholomæus et Matthæus, Iacobus Alphæi et Simon Zelotes et Iudas Iacobi. Hi omnes erant perseverantes unanimiter in oratione cum mulieribus et Maria matre Iesu et fratribus eius.
Psalmus responsorius 27(26), 1, 4, 7-8a
FRA •
L/F •
CMTR/ Credo vidére bona Dómini in terra vivéntium.
vel
R/ Allelúia.
Dominus illuminatio mea et salus mea; quem timebo?
Dominus protector vitæ meæ; a quo trepidabo?
Unum petii a Domino, hoc requiram:
ut inhabitem in domo Domini
omnibus diebus vitæ meæ,
ut videam voluptatem Domini
et visitem templum eius.
Exaudi, Domine, vocem meam, qua clamavi;
miserere mei et exaudi me.
De te dixit cor meum: « Exquirite faciem meam! ».
Léctio Epístolæ primæ béati Petri apóstoli 4, 13-16
FRA •
L/F •
CMT
Carissimi:
Quemadmodum communicatis Christi passionibus, gaudete, ut et in revelatione gloriæ eius gaudeatis exsultantes. Si exprobramini in nomine Christi, beati, quoniam Spiritus gloriæ et Dei super vos requiescit. Nemo enim vestrum patiatur quasi homicida aut fur aut maleficus aut alienorum speculator; si autem ut christianus, non erubescat, glorificet autem Deum in isto nomine.
Allelúia
Non relínquam vos órphanos, dicit Dóminus; vado et vénio ad vos, et gaudébit cor vestrum.
Léctio sancti Evangélii secúndum Ioánnem 17, 1-11a
FRA •
L/F •
CMT
In illo tempore:
Sublevatis oculis suis in cælum, dixit Iesus:
« Pater, venit hora: clarifica Filium tuum, ut Filius clarificet te, sicut dedisti ei potestatem omnis carnis, ut omne, quod dedisti ei, det eis vitam æternam. Hæc est autem vita æterna, ut cognoscant te solum verum Deum et, quem misisti, Iesum Christum.
Ego te clarificavi super terram; opus consummavi, quod dedisti mihi, ut faciam; et nunc clarifica me tu, Pater, apud temetipsum claritate, quam habebam, priusquam mundus esset, apud te.
Manifestavi nomen tuum hominibus, quos dedisti mihi de mundo. Tui erant, et mihi eos dedisti, et sermonem tuum servaverunt. Nunc cognoverunt quia omnia, quæ dedisti mihi, abs te sunt, quia verba, quæ dedisti mihi, dedi eis; et ipsi acceperunt et cognoverunt vere quia a te exivi et crediderunt quia tu me misisti.
Ego pro eis rogo; non pro mundo rogo, sed pro his, quos dedisti mihi, quia tui sunt; et mea omnia tua sunt, et tua mea; et clarificatus sum in eis. Et iam non sum in mundo, et hi in mundo sunt, et ego ad te venio ».