Clamavérunt iusti, et Dóminus exaudívit eos,

et ex ómnibus tribulatiónibus eórum liberávit eos.

Propter testaméntum Dómini et leges patérnas,

Sancti Dei perstitérunt in amóre fraternitátis:

quia unus fuit semper spíritus in eis, et una fides.

Deus, qui nos ánnua sanctórum N. et N. festivitáte lætíficas,

concéde propítius, ut, quorum natalícia cólimus,

virtútem quoque passiónis imitémur.

Per Dóminum.

Deus, qui sanctis N. et N.

ad hanc glóriam veniéndi copiósam munus grátiæ contulísti,

da fámulis tuis, mártyrum intercedéntibus méritis,

véniam peccatórum,

et concéde, ut ab ómnibus adversitátibus liberéntur.

Per Dóminum.

Hóstias tibi, Dómine,

pro commemoratióne beatórum N. et N. offérimus,

supplíciter deprecántes,

ut, sicut illis præbuísti sacræ fídei claritátem,

sic nobis indulgéntiam largiáris et pacem.

Per Christum.

In mortem trádimur propter Iesum,

ut et vita Iesu manifestétur in carne nostra mortáli.

Nolíte timére eos qui corpus occídunt,

ánimam autem non possunt occídere, dicit Dóminus.

Concéde nobis, Dómine, per hæc sacraménta cæléstia,

grátiam in beatórum mártyrum N. et N.

celebritáte multíplicem,

ut de tanti agóne certáminis discámus

et firma solidári patiéntia,

et pia exsultáre victória.

Per Christum.