Quam pulchri super montes

pedes annuntiántis et prædicántis pacem,

annuntiántis bonum, prædicántis salútem!

Dómine Deus, qui beátum Lucam elegísti,

ut prædicatióne et scriptis

mystérium tuæ in páuperes dilectiónis reveláret,

concéde, ut, qui tuo iam nómine gloriántur,

cor unum et ánima una esse persevérent,

et omnes gentes tuam mereántur vidére salútem.

Per Dóminum.

Donis cæléstibus, da nobis, quæsumus, Dómine,

líbera tibi mente servíre,

ut múnera, quæ in festivitáte beáti Lucæ deférimus,

et medélam nobis operéntur et glóriam.

Per Christum.

Misit Dóminus discípulos, qui nuntiárent civitátibus:

Appropinquávit in vos regnum Dei.

Præsta, quæsumus, omnípotens Deus,

ut, quod de sancto altári tuo accépimus, nos sanctíficet,

et in fide Evangélii, quod beátus Lucas prædicávit,

fortes effíciat.

Per Christum.