Die 9 novembris
IN DEDICATIONE BASILICÆ LATERANENSIS
Festum
Cf. Ap 21, 2
Vidi civitátem sanctam, Ierúsalem novam,
descendéntem de cælo a Deo,
parátam sicut sponsam ornátam viro suo.
Vel:
Cf. Ap 21, 3
Ecce tabernáculum Dei cum homínibus!
Et habitábit cum eis,
et ipsi pópulus eius erunt,
et ipse Deus cum eis erit eórum Deus.
Deus, qui de vivis et eléctis lapídibus
ætérnum habitáculum tuae præparas maiestáti,
multíplica in Ecclésia tua spíritum grátiæ, quem dedísti,
ut fidélis tibi pópulus
in cæléstis ædificatiónem Ierúsalem semper accréscat.
Per Dóminum.
Vel:
Deus, qui pópulum tuum Ecclésiam vocáre dignátus es,
da, ut plebs in nómine tuo congregáta
te tímeat, te díligat, te sequátur
et ad cæléstia promíssa, te ducénte, pervéniat.
Per Dóminum.
Súscipe, quæsumus, Dómine, munus oblátum,
et poscéntibus concéde,
ut hic sacramentórum virtus et votórum obtineátur efféctus.
Per Christum.
Præfatio: De mysterio Ecclesiæ, quæ est sponsa Christi templumque Spiritus.
FRA •
L/F
V. Dóminus vobíscum.
R. Et cum spíritu tuo.
V. Sursum corda.
R. Habémus ad Dóminum.
V. Grátias agámus Dómino Deo nostro.
R. Dignum et iustum est.
Vere dignum et iustum est, æquum et salutáre,
nos tibi semper et ubíque grátias ágere:
Dómine, sancte Pater, omnípotens ætérne Deus:
Qui domum oratiónis muníficus inhabitáre dignáris,
ut, grátia tua perpétuis fovénte subsídiis,
templum Spíritus Sancti ipse nos perfícias,
acceptábilis vitæ splendóre corúscans.
Sed et visibílibus ædifíciis adumbrátam,
Christi sponsam Ecclésiam perénni operatióne sanctíficas,
ut, innumerábili prole mater exsúltans,
in glóriam tuam collocétur in cælis.
Et ídeo, cum Sanctis et Angelis univérsis,
te collaudámus, sine fine dicéntes:
Sanctus, Sanctus, Sanctus Dóminus Deus Sábaoth.
Pleni sunt cæli et terra glória tua.
Hosánna in excélsis.
Benedíctus qui venit in nómine Dómini.
Hosánna in excélsis.
Cf. 1 Petr 2, 5
Tamquam lápides vivi superædificámini,
domus spiritális, sacerdótium sanctum.
Deus, qui nobis supérnam Ierúsalem
per temporále Ecclésiæ tuæ signum adumbráre voluísti,
da, quæsumus, ut, huius participatióne sacraménti,
nos tuae grátiæ templum effícias,
et habitatiónem glóriæ tuæ íngredi concédas.
Per Christum.