Gressus meos dírige secúndum elóquium tuum,

et non dominétur mei omnis iniustítia.

Præsta, quæsumus, Dómine,

ut, per quadragesimálem observántiam erudíti

et tuo verbo nutríti,

sancta continéntia tibi simus toto corde devóti,

et in oratióne tua semper efficiámur concórdes.

Per Dóminum.

Súscipe, quæsumus, Dómine,

preces pópuli tui cum oblatiónibus hostiárum,

et tua mystéria celebrántes

ab ómnibus nos defénde perículis.

Per Christum.

Notas mihi fecísti vias vitæ,

adimplébis me lætítia cum vultu tuo, Dómine.

Sanctíficet nos, Dómine, qua pasti sumus, mensa cæléstis,

et, a cunctis erróribus expiátos,

supérnis promissiónibus reddat accéptos.

Per Christum.

Tibi plácitam, Deus noster, pópulo tuo tríbue voluntátem,

quia tunc illi próspera cuncta præstábis

cum tuis aptum féceris institútis.

Per Christum.