Sitiéntes, veníte ad aquas, dicit Dóminus;

et qui non habétis prétium, veníte,

et bíbite cum lætítia.

Exercitátio veneránda sanctæ devotiónis, Dómine,

tuórum fidélium corda dispónat,

ut et dignis méntibus suscípiant paschále mystérium,

et salvatiónis tuæ núntient præcónium.

Per Dóminum.

Offérimus tibi, Dómine, múnera quæ dedísti,

ut et creatiónis tuæ circa mortalitátem nostram

testificéntur auxílium,

et remédium nobis immortalitátis operéntur.

Per Christum.

Dóminus regit me, et nihil mihi déerit;

in loco páscuæ ibi me collocávit,

super aquam refectiónis educávit me.

Purífica, quæsumus, Dómine, mentes nostras benígnus,

et rénova cæléstibus sacraméntis,

ut consequénter et córporum præsens

páriter et futúrum capiámus auxílium.

Per Christum.

Concéde, miséricors Deus,

ut devótus tibi pópulus semper exístat

et de tua cleméntia,

quod ei prosit, indesinénter obtíneat.

Per Christum.