Novi Testaménti mediátor est Christus,

ut, morte intercedénte, repromissiónem accípiant,

qui vocáti sunt ætérnæ hereditátis.

Adésto, Dómine, supplícibus tuis,

et spem suam in tua misericórdia collocántes

tuére propítius,

ut, a peccatórum labe mundáti,

in sancta conversatióne permáneant,

et promissiónis tuæ perficiántur herédes.

Per Dóminum.

Sacrifíciis præséntibus, quæsumus, Dómine,

placátus inténde,

ut et conversióni nostræ profíciant

et totíus mundi salúti.

Per Christum.

Próprio Fílio suo non pepércit Deus,

sed pro nobis ómnibus trádidit illum:

cum illo ómnia nobis donávit.

Satiáti múnere salutári,

tuam, Dómine, misericórdiam deprecámur,

ut hoc eódem sacraménto, quo nos temporáliter végetas,

effícias perpétuæ vitæ partícipes.

Per Christum.

Esto, quæsumus, Dómine, propítius plebi tuæ,

ut, de die in diem, quæ tibi non plácent réspuens,

tuórum pótius repleátur delectatiónibus mandatórum.

Per Christum.