Dóminus illuminátio mea, et salus mea, quem timébo?

Dóminus defénsor vitæ meæ, a quo trepidábo?

Qui tríbulant me inimíci mei, ipsi infirmáti sunt.

Deus, a quo bona cuncta procédunt,

tuis largíre supplícibus,

ut cogitémus, te inspiránte, quæ recta sunt,

et, te gubernánte, éadem faciámus.

Per Dóminum.

Réspice, Dómine, quæsumus, nostram propítius servitútem,

ut quod offérimus sit tibi munus accéptum,

et nostræ caritátis augméntum.

Per Christum.

Dóminus firmaméntum meum,

et refúgium meum, et liberátor meus.

Deus meus adiútor meus.

Deus cáritas est, et qui manet in caritáte

in Deo manet et Deus in eo.

Tua nos, Dómine, medicinális operátio,

et a nostris perversitátibus cleménter expédiat,

et ad ea quæ sunt recta perdúcat.

Per Christum.