Iustus es, Dómine, et rectum iudícium tuum;

fac cum servo tuo secúndum misericórdiam tuam.

Deus, per quem nobis

et redémptio venit et præstátur adóptio,

fílios dilectiónis tuæ benígnus inténde,

ut in Christo credéntibus

et vera tribuátur libértas, et heréditas ætérna.

Per Dóminum.

Deus, auctor sincéræ devotiónis et pacis,

da, quæsumus, ut et maiestátem tuam

conveniénter hoc múnere venerémur,

et sacri participatióne mystérii fidéliter sénsibus uniámur.

Per Christum.

Quemádmodum desíderat cervus ad fontes aquárum,

ita desíderat ánima mea ad te, Deus:

sitívit ánima mea ad Deum fortem vivum.

Ego sum lux mundi, dicit Dóminus;

qui séquitur me, non ámbulat in ténebris,

sed habébit lumen vitæ.

Da fidélibus tuis, Dómine,

quos et verbi tui et cæléstis sacraménti pábulo

nutris et vivíficas,

ita dilécti Fílii tui tantis munéribus profícere,

ut eius vitæ semper consórtes éffici mereámur.

Qui vivit et regnat in sæcula sæculórum.