Ego clámavi, quóniam exaudísti me, Deus;

inclína aurem tuam, et exáudi verba mea.

Custódi me, Dómine, ut pupíllam óculi;

sub umbra alárum tuárum prótege me.

Omnípotens sempitérne Deus,

fac nos tibi semper et devótam gérere voluntátem,

et maiestáti tuæ sincéro corde servíre.

Per Dóminum.

Tríbue nos, Dómine, quæsumus,

donis tuis líbera mente servíre,

ut, tua purificánte nos grátia,

iísdem quibus famulámur mystériis emundémur.

Per Christum.

Ecce óculi Dómini super timéntes eum,

et in eis qui sperant super misericórdia eius;

ut éruat a morte ánimas eórum, et alat eos in fame.

Fílius hóminis venit,

ut daret ánimam suam redemptiónem pro multis.

Fac nos, quæsumus, Dómine,

cæléstium rerum frequentatióne profícere,

ut et temporálibus benefíciis adiuvémur,

et erudiámur ætérnis.

Per Christum.